Qaraǵandyda jańa Teez marketpleısi óz jumysyn bastady. Onyń negizgi artyqshylyǵy - tapsyrystardy bir kún ishinde jetkizý. Tapsyrys berý pýnktteri eldiń 24 óńirinde ashyldy, dep habarlaıdy Egemen.kz.
Saýda jáne ıntegrasııa mınıstri Arman Shaqqalıev Qaraǵandy oblysynyń ákimi Ermaǵanbet Búlekpaevpen birge elektrondy saýda alańynyń birlesken qoımasyn aralap kórdi. Olarǵa barlyq logıstıka joldary kórsetilip, iske qosý nátıjeleri men otandyq marketpleıstiń aldaǵy josparlary týraly baıandaldy.
Teez marketpleısiniń qalaýshylarynyń biri Lınar Hýsnýllın qazirgi ýaqytta marketpleıstiń 40 tapsyrys pýnkti bar ekenin, aldaǵy ýaqytta jospar boıynsha olardyń sany 127-ge jetetinin atap ótti. Qazirdiń ózinde 540 satýshy tirkelgen jáne ónim assortımentiniń sany 50 myńnan asady. Sondaı-aq kompanııa elektrondyq qosymsha jasap, ony qysqa merzimde júktegen adamdardyń sany 170 myńnan asatynyn jetkizdi.
Marketpleıstiń qoımalary tórt korpýsta ornalasqan, jalpy alańy - 25 myń sharshy metr. Al 2030 jylǵa deıin saqtaý qoımalaryn 120 myń sharshy metrge deıin keńeıtýdi josparlap otyr. Qaraǵandyda qurylys úshin jer ýchaskesi de tabyldy. Aldaǵy ýaqytta kompanııa ınternet-saýdanyń kóshbasshylarynyń birine aınalýǵa bel býyp otyr.
Arman Shaqqalıev búginde elektrondy saýdanyń qarqyndy damyp kele jatqanyn jáne ol álemdik ekonomıkalyq ósimniń mańyzdy draıveri bolǵanyn atap ótti.
«Sońǵy jyldary elektrondy saýdanyń kólemi kúrt ósti. Qazaqstandyq elektrondy saýda ekojúıesin damytý maqsatynda kólik-logıstıkalyq ınfraqurylymdy jaqsartý, qaǵazsyz saýdany engizý jáne halyqtyń sıfrlyq saýattylyǵyn arttyrý boıynsha jumys júrgizilip jatyr. Tek 10 aıdyń qorytyndysy boıynsha saýda kólemi ótken jyldyń sáıkes kezeńimen salystyrǵanda 20%-ǵa artty. Bul kórsetkish 3 trln teńgeden asady. Mundaı jobalar ekonomıkaǵa oń áser etip, tutynýshylar úshin taýarlarǵa qoljetimdilikti keńeıtedi», dedi Arman Shaqqalıev.
Sapar barysynda Arman Shaqqalıev Osakarov aýdanynyń kásipkerlerimen jáne turǵyndarymen kezdesti. Is-sharada Saýda jáne ıntegrasııa mınıstrliginiń negizgi jetistikteri jáne saýda sektoryn ári qaraı damytý josparlary talqylandy.
Basty nazar - elimizdegi saýda naryǵyn jańǵyrtýǵa qoıyldy. Saýda jáne ıntegrasııa mınıstrligi saýda naryǵyn jańǵyrtý jáne sıfrlandyrý boıynsha belsendi jumystar júrgizip jatyr. Jol kartasy aıasynda Qaraǵandy oblysynyń bes saýda bazarynyń jańǵyrtýy josparlanǵan, bul prosess 2025 jyly aıaqtalady. Olardyń ishinde «Shyǵys», «Altyn arba», «Tulpar», «Qaırat» jáne «Gornıak» bazarlary bar.
Mınıstr ishki saýda salasynda memlekettik qoldaý sharalaryn qamtamasyz etý boıynsha quzyretke ıe bolǵanyn basa aıtty. Qoldaý satyp alýshylar men bıznestiń suranystaryna saı ınfraqurylym qurýǵa múmkindik beretinin aıtty. Qazirgi ýaqytta Qaraǵandy oblysy boıynsha Damý qory 7 mıllıard teńge kóleminde 19 jobany qarjylandyrýǵa arnalǵan pýl qurǵan.
Mınıstr sondaı-aq aýyldyq dúken men iri qalalyq sýpermarketke baryp, sórelerde otandyq taýarlardyń ornalasýyn kórdi. Ol jumyrtqa satylatyn bólimge de kirip, óndirýshiniń baǵasymen usynylǵan – 470 teńgege saýdalanyp turǵan S1 sanatyndaǵy jumyrtqalardyń bar ekenin kórdi.
Arman Shaqqalıev sondaı-aq «Qaraǵandy Nan» korporasııasynyń jumysymen tanysty. Bul kompanııa nan, makaron, jumyrtqa jáne basqa ónimderdi shyǵarady, sondaı-aq tek Qaraǵandy oblysyn ǵana emes elimizdiń óńirlerin qosa alǵanda, jaqyn shetelderge de ónim eksporttaıdy. Makaron ónimderi Reseı, О́zbekstan, Ázerbaıjan, Qytaı, Qyrǵyzstan jáne basqa elderge aıyna 400-600 tonna kóleminde eksporttalady. Sonymen qatar kondıterlik ónimder, un, jumyrtqa, jumyrtqa untaǵy men jarma syrtqa shyǵyp jatyr. Qazirgi ýaqytta kompanııa Qytaı naryǵyna shyǵýdy josparlap otyr, maqsat - turaqty jáne uzaq merzimdi kelisimsharttarǵa qol jetkizý. Arman Shaqqalıev jeltoqsan aıynda Úrimshide Qazaqstannyń úlken pavılonyn ashýdy jáne ol jerde korporasııanyń ónimderin ornalastyrýdy usyndy.
Jumys saparynyń qorytyndysy boıynsha mınıstr Qaraǵandy oblysynyń geografııalyq ornalasýy men ınfraqurylymynyń tıimdiligin eskere otyryp, oblys Qazaqstannyń negizgi saýda-logıstıkalyq ortalyǵyna ǵana emes, búkil Ortalyq Azııa aımaǵy úshin mańyzdy habqa aınalýǵa áleýeti bar ekenin atap ótti.