Qazirgi kezde barsha qazaq jankúıeri 7 jeltoqsanda AQSh-tyń Las-Vegas qalasynda aralas jekpe-jekten ótetin «UFC 310» týrnırin taǵatsyzdana kútip otyr. Sol jarystyń basty básekesinde Shavqat Rahmonov jartylaı orta salmaqtyń chempıondyq táji úshin Muhammad Belalmen kúsh synasýǵa tıis edi. Biraq aıaqasty densaýlyǵy syr bergen AQSh sportshysy jekpe-jekke shyǵýdan bas tartty. Sóıtip, altyn belbeý úshin aıqas keıinge shegerildi.
Joǵarydaǵy jaǵdaıdan qulaǵdar bolǵan mezette uıymdastyrýshylar dereý Shavqat Rahmonovqa basqa qarsylas izdeýge kiristi. Olardyń tańdaýy Ien Gerrıge tústi. Ol sportshy jaıynda biz ne bilemiz? Kúni keshe ǵana 27 jasqa tolǵan Ien Irlandııanyń shyǵysyndaǵy Fıngal óńirinde ornalasqan Partmarnok dep atalatyn shaǵyn ǵana eldimekende dúnıege keldi. Áý basta ol bokspen aınalysty. Kezekti bir jarysta atyshýly Konor Makgregordyń kózine túsip, UFC-diń eks-chempıony jalyndy jasqa MMA-men aınalysýǵa keńes berdi. Sol josparyn júzege asyrý jolynda Gerrıge dzıýdo men grepplıngti meńgerýge týra keldi.
Aralas jekpe-jekten kásipqoılar arasyndaǵy óziniń tusaýkeser kezdesýin Ien Gerrı 2019 jyldyń 16 aqpanynda ótkizdi. Sodan bergi bes jyldan asa ýaqyt aralyǵynda 15 kezdesý ótkizgen ol barlyǵynda jeńiske jetti. Sonyń segizinde qarsylastaryn nokaýtqa jiberse, bireýinde «qylǵyndyrý» tásilin qoldandy. Taǵy jeti básekeniń sheshimin tóreshiler shyǵardy. Gerrı ár jyldary Djeıms Shıhan, Matteo Kelıa, Mateýsh Fıglak, Djordj MakManýs, Loýrens Treısı, Rostem Akman, Djek Grant, Djordan Ýılıams, Derıan Ýıks, Geıb Grın, Sýn Kenan, Denıel Rodrıges, Nıl Magnı, Djeff Nıl, Maıkl Peıdj syndy sańlaqtardy sabady.
Ienniń boıy 191 santımetr, jartylaı orta salmaqtaǵylardyń arasyndaǵy eń boıshańy. UFC reıtınginde jetinshi orynda turǵan Irlandııanyń ókili osy kúnge deıin bul artyqshylyǵyn óte utymdy paıdalanyp kelgen edi. Al Shavqatpen qalaı bolatynyn 7 jeltoqsanda ótetin jarysta kóremiz.
Las-Vegastaǵy jarysta Shavqat Rahmonov pen Ien Gerrıden bólek, Aleshandre Pantoja men Kaıa Asakýra, Aleksandr Volkov pen Sırıl Gan Nık Dıaz pen Vısente Lýke, Movsar Evloev pen Aldjameın Sterlıng, Entonı Smıt pen Domınık Reıes, Kodı Dıorden pen Djoshýa Van, Maıkl Keza pen Maks Grıffın, Braıan Battl men Rendı Braýn, Kleı Gýıda men Cheız Hýper, Talısson Teısheıra men Lýkash Brjeskı, Rızvan Kýnıev pen Martın Býdaı, Krıs Ýaıdman men Erık Anders arasyndaǵy jekpe-jekterdi tamashalaımyz.