Jetisý oblysynyń polıseıleri prokýratýranyń úılestirýimen quramynda shetel azamattary bar uıymdasqan alaıaqtar tobyn ustady, dep habarlaıdy Egemen.kz tilshisi oblystyq prokýratýraǵa silteme jasap.
Qylmystyq nıetterine qol jetkizý úshin olar ártúrli aldaý shemalary men zamanaýı tehnologııalardy, ıaǵnı qashyqtan qol jetkizý qoldanbalaryn (AnyDesk, Kenguru, Teamviewer) jáne t.b. paıdalanǵan. Toptyń óziniń «Qolma-qol aqsha sheshý ortalyǵy» bar, ol dropperlerdi paıdalanyp, qarajatty krıptovalıýtaǵa aýdaryp otyrǵan.
«4 adamnan turatyn top, sheteldik azamattarmen birlese otyryp, bizdiń oblystyń júzden astam turǵynyn aldaǵan, olar 100 mıllıon teńgeden astam shyǵynǵa ushyraǵan», dep habarlady oblystyq prokýratýranyń baspasóz qyzmeti.
Olardyń turǵylyqty jerin tintý kezinde 35 uıaly telefon, 3 júıelik blok, 3 noýtbýk, 2 pnevmatıkalyq tapansha jáne qymbat nómirleri bar 3 lıýks kólik tárkilengen. Toptyń 4 múshesine qatysty sotqa deıingi tergep-tekserý júrgizilip jatyr.
Qylmys jasaǵany úshin kúdiktiler múlkin tárkileı otyryp, jeti jylǵa deıin bas bostandyǵynan aıyrý túrindegi jazaǵa tartylýy múmkin.