«Taza Qazaqstan» jalpyulttyq ekologııalyq aksııasy aıasynda H.Dosmuhamedov atyndaǵy Atyraý ýnıversıteti stýdentteriniń ekologııalyq máselelerdi sheshýge arnalǵan ınnovasııalyq jobalar men kreatıvti art týyndylar kórmesiniń BAQ ókilderine arnalǵan prezentasııasy ótti, dep habarlaıdy Egemen.kz.
Memleket basshysy Qasym-Jomart Toqaev «Taza Qazaqstan» jalpyulttyq ekologııalyq aksııasynyń mańyzyna toqtala otyryp, onyń qazaqstandyqtardy tabıǵatqa qamqor bolý ıdeıasynyń tóńiregine biriktire alatyn maǵynaǵa ıe ekenin atap ótken edi. Bastamanyń bul aspektisi mańyzdy, biraq jobanyń ómirsheńdigi men oń nátıjege jetý úshin qosymsha sharalar qajet, sonyń ishinde stýdenttik ǵylymı jobalar men ekologııalyq saladaǵy zertteý nátıjelerin tartýdyń mańyzy zor.
H. Dosmuhamedov atyndaǵy Atyraý ýnıversıteti «Taza Qazaqstan» jalpyulttyq ekologııalyq aksııasynyń óńirde sátti júzege asyrylýyna belsendi atsalysýda. Oqytýshylar men stýdentter jalpy proseske «Ekojobalar» jáne «Taza beısenbi» baǵyttary boıynsha tartylǵan.
Birinshi baǵyt boıynsha ýnıversıtettiń «Jas Sana» ortalyǵynda ınnovasııalyq jobalar men kreatıvti art týyndylar prezentasııasy uıymdastyryldy. Prezentasııaǵa Atyraý ýnıversıtetiniń «Ekos» ekologııalyq úıirmesiniń jobalary qoıyldy. Olardyń arasynda startap joba retinde qarjylandyrylǵandary da bar.
«Shyny qaldyqtaryn paıdalana otyryp, epoksıdti shaıyrdan buıymdar jasaý» jobasy avtorlarynyń aıtýynsha bul turmystyq qaldyqtardy ádemi ári paıdaǵa jaramdy buıymǵa aınaldyrýǵa baǵyttalǵan biregeı joba.
«Bul tek lastanýdyń aldyn alý ǵana emes, sonymen qatar shaǵyn jáne orta bıznesti damytýǵa da úlken múmkindik. Bul joba áli de jetildirilý ústinde. Bolashaqta daıyn ónimder jergilikti naryqqa shyǵarylatyn bolady», deıdi joba avtorlarynyń biri Aqmaral Saǵynǵalıeva.
Sondaı-aq kórmede «Kúkirt qaldyqtarynan kúkirt betonyn jasaý» jáne «Temeki qaldyqtaryn paıdalana otyryp, tas tósenishter óndirý» sııaqty ınnovasııalyq jobalar usynylǵan. Qaldyqsyz óndiris turǵysynan jáne qorshaǵan ortaǵa zııandy meılinshe azaıtý turǵysynan tıimdi kóringen jobalardyń biri – «Bıoplastık jasaý». Stýdentterdiń aıtýy boıynsha, jergilikti shıkizattan bıoplastık alý, bul ımportty almastyrý jáne ekologııalyq júktemeni azaıtý turǵysynan óte tıimdi joba.
«Basty maqsat – jaramdy shıkizat kózin anyqtap, bıologııalyq ortada tez ydyraıtyn bıoplastık óndirisiniń tehnologııasyn jasaqtaý. Bundaı bastamalardy qoldaý Qazaqstandaǵy anaǵurlym taza jáne turaqty ortany qalyptastyrýdaǵy úlken qadam bolatyn edi», dep esepteıdi joba avtorynyń biri Dmıtrıı Ýrgarchev.
«Taza Qazaqstan» jalpyulttyq ekologııalyq aksııasyn júzege asyrýda ýnıversıtet ustanǵan ekinshi basym baǵyt – jalpy ýnıversıtettik ekologııalyq aksııalar. Ár beısenbide 100-ge jýyq stýdent ýnıversıtetke qarasty aýmaqtyń tazalyǵyn qamtamasyz etedi. «Taza Qazaqstan» aksııasy bastaý alǵannan beri jalpy kólemi 3 tonnaǵa jýyq qatty turmystyq qaldyq jınalǵan.
Stýdentter ár apta saıyn, sabaqtan tys kúnderi, óz erkimen oqý ǵımarattary men jataqhanalar aýmaǵyn tazalaý jumystaryn júrgizip turady. Jastardyń boıynda týǵan jerge degen súıispenshilikti oıatý jáne eko-mádenıetti qalyptastyrý maqsatynda sabaq kezinde, atalmysh baǵyt boıynsha eńbektenip, bastapqy tájirıbe jınaqtap úlgergen jas ǵalymdar úshin praktıkalyq jáne teorııalyq dárister ótkiziledi.
Odan bólek Atyraý ýnıversıteti ujymy men stýdentteri kóktemgi sý tasqyny qaýpi kezinde, ózderine senip tapsyrylǵan 5 shaqyrymnan astam jaǵalaý aýmaǵynda, jaǵalaýdy bekitý jáne damba soǵý jumystaryna belsendi aralasty.
Bul baǵyttaǵy jumystar aldaǵy ýaqytta da jalǵasyn tappaq. Kóktem jáne kúz aılarynda ýnıversıtet ujymy dástúrli túrde jalpyqalalyq kóshet otyrǵyzý jumystaryna kirisedi.