Elordadaǵy «Jastar» saraıynda «Stýdenttik ózin-ózi basqarý» jobasy aıasynda ótken baıqaýdyń jeńimpazdary marapattaldy, dep habarlady Egemen.kz qala ákimdiginiń resmı saıtyna silteme jasap.
«Astana jastary» jastar resýrstyq ortalyǵy uıymdastyrǵan marapattaý rásimi bastalǵanǵa deıin zamanaýı bı, halyq bıi, ulttyq aspaptarda oınaý jáne vokal sııaqty nomınasııalar boıynsha baıqaýlar ótti. Atalmysh is-sharaǵa elordalyq JOO stýdentteri belsene qatysty.
«Mundaı is-sharalar jastardyń ózara qarym-qatynasyn nyǵaıtyp, netvorkıng ornatýyna jáne kóshbasshylyq qasıetterin tanytýyna yqpal etedi. Sondaı-aq, olardyń sportqa, belsendi ómir saltyna degen qyzyǵýshylyǵy artatyn bolady. Osylaısha turaqty negizde uıymdastyrylatyn is-sharalar arqyly elordalyq jastarǵa jıi bas qosyp, jańa ıdeıalardy ortaǵa tastap, ony júzege asyrýda birlese is-áreket isteýge, damı túsýge jol ashylmaq», dedi Astana qalasynyń máslıhat depýtaty Arslanbek Maǵzum.
Shyǵarmashylyq baıqaýlar aıaqtalǵan soń jeńimpazdardy saltanatty marapattaý sáti bastaldy.
«Is-sharanyń negizgi maqsaty – Astana jastaryn biriktirý. Munda elordalyq stýdentter ózderin tanytyp qana qoımaıdy, sonymen birge oqý oryndarynyń abyroıyn asqaqtatýǵa úles qosady. Marapattaý rásimi óz deńgeıinde ótti dep oılaımyn. Barlyq jeńimpaz alǵys hattar men qarjylaı syılyqtar, al sportshylar kýboktar men medaldarǵa ıe boldy», dedi «Astana jastary» jastar resýrstyq ortalyǵynyń qyzmetkeri Kamılla Muqataeva.
Jeńimpazdardy atap aıtsaq, fýtboldan jáne voleıboldan APEMS komandasy, tennısten L.Gýmılev atyndaǵy Eýrazııa ulttyq ýnıversıteti, basketboldan S.Seıfýllın atyndaǵy Qazaq agrotehnıkalyq zertteý ýnıversıteti stýdentteri 1-oryndy jeńip aldy. Al aspaptarda oınaý men vokal boıynsha Qazaq ulttyq óner ýnıversıteti, zamanýı bıden Esil University, halyq bıinen Astana international university stýdentteri 1-oryndy ıelendi.