Búgin Astanada KAZENERGY qaýymdastyǵynyń Tóraǵasy Maǵzum Myrzaǵalıevtiń basshylyǵymen Qaýymdastyq Keńesiniń 41-shi otyrysy ótti. Keńes músheleri 2024 jyly atqarylǵan jumystardyń qorytyndylaryn, negizgi jetistikterdi, qurylymdyq ózgeristerdi jáne aldaǵy jylǵa arnalǵan josparlardy talqylady, dep habarlaıdy Egemen.kz.
Keńes otyrysynda Memleket basshysynyń Joldaýynda belgilengen munaı-gaz jáne elektr energetıkasy sektorlaryn damytýǵa baǵyttalǵan mindetterge basty nazar aýdaryldy.
KAZENERGY Bas dırektory Jandos Nurmaǵanbetov Qaýymdastyqtyń aǵymdaǵy jyl ishinde atqarylǵan jumystar jóninde esep berip, aldaǵy kezeńge arnalǵan josparlar jaıynda aıtyp berdi.
«2024 jylǵy jetistikter arasynda QR Úkimetiniń qoldaýymen jáne QR Parlamentiniń jumys komıtetterine belsendi qatysý arqyly birqatar salalyq máseleler ońtaıly sheshimin tapty. «ENERGIIа» taldaý ortalyǵy quryldy, ol EXia platformasynyń kómegimen otyn-energetıkalyq keshen úshin taldamalyq saraptama jasaýdyń negizgi kózine aınaldy.Zańnamalyq bazany jetildirý jónindegi jumys sheńberinde Qaýymdastyq sarapshylary QR Parlamentiniń jumys toptarynyń 30-dan astam otyrysyna qatysty. Bul geologııalyq barlaýǵa salynatyn ınvestısııalardyń artýyna yqpal etedi jáne ınvestısııa kólemi 15 mlrd AQSh dollarynan asatyn munaı-gaz hımııasy ónerkásibin damytýdyń Jol kartasyn bekitýge múmkindik berdi. Munyń nátıjesinde 20 myń jumys orny ashylyp, 2030 jylǵa qaraı óndiris kólemi eki esege artatyn bolady», dedi Jandos Nurmaǵanbetov.
Halyqaralyq arenada KAZENERGY Astanada 2028 jyly Dúnıejúzilik munaı kongresin ótkizý quqyǵyna qol jetkizdi. Kelesi jyldan bastap energetıka men munaı-gaz salasynyń álemdik kóshbasshylarynyń qatysýymen ótetin osynaý jahandyq jıynǵa daıyndyq jumystary bastalady.
Sonymen qatar otyrysta QR Energetıka vıse-mınıstri Erlan Aqkenjenov, sondaı-aq «QazMunaıGaz», «Teńizshevroıl» jáne ExxonMobil Kazakhstan kompanııalarynyń ókilderi sóz sóıledi.
Is-shara sońynda Qaýymdastyqtyń dástúrli Ulttyq energetıkalyq baıandamasynyń jeńildetilgen KAZENERGY Outlook 2024 nusqasynyń alǵashqy shyǵarylymy tanystyryldy.