Taılandta ótip jatqan Azııa chempıonatynyń tórtinshi kúni elimizdiń úsh bylǵary qolǵap sheberi rıngke kóterilip, barlyǵy da qarsylastarynan basym tústi. Olar – Mahmud Sabyrhan (54 kg), Aıda Ábikeeva (63 kg), Mılana Safronova (67 kg).
Kópshilik nazary Mahmud Sabyrhan men taıpeılik Iаn Lın Laı arasyndaǵy jekpe-jekke aýdy. Qandasymyz – eki álem chempıonatynda jeńis tuǵyryna kóterilip, jankúıerler júregin áldeqashan jaýlap úlgergen jampoz. Ol 2021 jyly Belgradta kúmis alsa, 2023 jyly Tashkentte bas júldeni qanjyǵasyna baılady. Sol aralyqta qurlyq chempıonatynyń kúmis medalin moınynda jarqyratty. Sonymen qatar bıyl Mahmud Parıj Olımpıadasynda baq synady. Iаn Lın Laıda ondaı ataqtyń biri de joq. Sol sebepti de Sabyrhanǵa qarsylasyna san soqtyrý aıtarlyqtaı qıyndyq týǵyzbady. Birinshi raýnda-aq Taıpeı boksshysyn úsh ret nokdaýnǵa jiberip, tóreshiniń básekeni merziminen buryn toqtatýdan basqa amaly qalmady.
Aıda Ábikeeva ózbekstandyq Dılfýza Bekovamen biraz taban tiresti. Desek te úsh raýndtyń qorytyndysy boıynsha qazylar Aıdanyń myqtylyǵyn moıyndady. Al Mılana Safronovamen kúsh synasýǵa tıis taıpeılik Mın Lımen rıngke kóterilýden bas tartty. Sóıtip joǵaryda esimderi atalǵan úsh jerlesimiz jartylaı fınalǵa joldama aldy.
Keshe Dýlat Bekbaýov (67 kg) malaızııalyq Aıman Muhammad Arıfpen, Abylaıhan Júsipov (71 kg) túrikmenstandyq Baıramdýrdy Nurmuhammedovpen, Dıas Moljigitov (75 kg) japonııalyq Daıgo Sýnagomen, Áıgerim Sáttibaeva (48 kg) fılıppındik Ofelııa Magnomen, Symbat Álıasqar (54 kg) qytaılyq Vensıan Sıýmen saıysqa tústi.