Kezdesýde jańartylatyn energııa kózderi salasyndaǵy ınvestısııalyq yntymaqtastyqtyń perspektıvalary talqylandy, dep jazady Egemen.kz Aqordanyń baspasóz qyzmetine silteme jasap.
Qasym-Jomart Toqaev taıaýda Nebras Power kompanııasy men «Samuryq-Energo» aksıonerlik qoǵamynyń arasynda Semeı GES-iniń qurylysyna qatysty kelisimge qol qoıylǵanyn quptady. Stansııanyń qýattylyǵy 300 megavatt bolady. Prezıdent bul jobanyń Astana men Dohanyń uzaqmerzimdi strategııalyq seriktestigin nyǵaıtýdaǵy rólin joǵary baǵalady. Atalǵan bastamany tabysty júzege asyrý úshin Qazaqstan Úkimetiniń jan-jaqty qoldaý kórsetetinin rastady.
Memleket basshysynyń aıtýynsha, elimiz 2030 jylǵa qaraı energııa balansyndaǵy jańartylatyn qýat kózderiniń úlesin 15 paıyzǵa deıin arttyrýǵa nıetti.
Muhammed Nasser Ál-Hadjrı Qasym-Jomart Toqaevqa birlesken jobany iske asyrýdyń negizgi kezeńderi jóninde málimet berip, «jasyl» energetıka salasyndaǵy Qazaqstannyń áleýeti zor ekenin aıtty.