Qazaqstan Respýblıkasynyń syrtqy saıası vedomstvosynda Syrtqy ister mınıstriniń birinshi orynbasary Aqan Rahmetýllınniń qatysýymen «Qazaqstannyń izgi nıet elshileriniń» ekinshi pýlyn taǵaıyndaý saltanatty rásimi ótti, dep habarlaıdy Egemen.kz.
Memleket basshysy bastamashylyq etken «Qazaqstannyń izgi nıet elshileri» jobasy mádenıetter pen halyqtar arasyndaǵy dıalogty damytýǵa jáne elimizdiń jetistikterin shet elderde dáripteý men tanymaldylyǵyn arttyrýǵa baǵyttalǵan.
Bul jobaǵa qatysý úshin Qazaqstannyń qoǵam jáne mádenı qaıratkerleri shaqyryldy, olardyń arasynda Halyq ártisi Dımash Qudaıbergen, opera ánshisi Marııa Mýdrıak, telejúrgizýshi jáne mádenı jobalardyń prodıýseri Maııa Bekbaeva, arheolog jáne Qazaqstan Respýblıkasynyń IýNESKO jáne ISESKO isteri jónindegi ulttyq komıssııanyń múshesi Dmıtrıı Voıakın, «Qazaq Geography» basqarma basshysy, etnograf-ǵalym Aıgerim Musaǵajınova bar.
A.Rahmetýllın óziniń alǵy sózinde Qazaqstan álemde beıbitshilikke umtylatyn jáne progressıvti memleket, sondaı-aq jahandyq jáne óńirlik máselelerdi sheshýde senimdi seriktes retinde qabyldanatynyn atap ótti.
Qazaq dıplomatynyń aıtýynsha, Syrtqy ister mınıstrligi sheteldik aýdıtorııany elimizdiń mádenı murasy men ulttyq alýan túrliligimen tanystyrý jáne olardy ilgeriletý boıynsha aýqymdy jumys júrgizýde. Osyǵan baılanysty A.Rahmetýllın elimizdiń tanymaldylyǵyn odan ári arttyrýǵa baǵyttalǵan «Kazakhstan: Born Bold» halyqaralyq ımıdjdik naýqanynyń bastalǵanyn habarlady.
Qazirgi ýaqytta sıfrlyq kommýnıkasııalar álemindegi mádenı-gýmanıtarlyq dıplomatııanyń mańyzdylyǵy men ózektiligin atap ótip, A.Rahmetýllın qatysyp otyrǵan qoǵam qaıratkerleriniń Qazaqstannyń túrli salalardaǵy jetistikterin dáripteýdegi kúsh-jigerin joǵary baǵalady.
- Izgi nıet elshisiniń mártebesi tek bedel ǵana emes, sonymen birge úlken jaýapkershilik. Joba aıasynda biz mádenıetimiz, ónerimiz, ǵylymı jetistikterimiz, ınnovasııalar, sporttyq jeńister, kreatıvti sheshimder, týrıstik áleýet pen Qazaqstan halqynyń basty qundylyǵy – beıbitshilik pen kelisimdi saqtaýmen tanystyrýdy jalǵastyrýǵa nıettimiz, − dep atap ótti A.Rahmetýllın.
О́z sózinde D.Voıakın Qazaqstannyń kúshi onyń mádenı ártúrliliginde, murasynda jáne biz ony saqtaýǵa jáne ulǵaıtýǵa mindettimiz dedi.
- Izgi nıet elshisi bolý – shabyttandyrýdy bildiredi. Bizdiń ortaq eńbegimiz ǵylym, mádenıet jáne adamdardyń ózara túsinistiginiń kúshine senetinder úshin birlik pen shabyttyń sımvolyna aınalsyn, – dedi ol.
Artylǵan senim úshin alǵysyn bildire otyryp, M.Bekbaeva elimizdiń ejelgi mádenıeti men baı tarıhymyzdyń negizinde jatqan birlik, tózimdilik jáne beıbitshilik qundylyqtardy atap ótti. Ol joba aıasynda osy qaǵıdattar men qundylyqtardy, sondaı-aq SIM-men tyǵyz baılanys arqyly Qazaqstannyń shet eldermen mádenı jáne gýmanıtarlyq yntymaqtastyǵyn ilgeriletýge nıetti ekenin atap jetkizdi.
Qazaqstanda Izgi nıet elshileri qyzmetiniń sátti halyqaralyq tájirıbesin engizý búgingi tańda el bedelin ilgeriletýde óz nátıjesin kórsetýde. «Izgi nıet elshileriniń» pýlyn keńeıtý álemniń ár túkpirindegi azamattardyń Qazaqstandy odan da jaqynyraq tanýy úshin shabyttandyrýǵa arnalǵan.
Buǵan deıin Izgi nıet elshileri mártebesin skrıpkashy-vırtýoz Marat Bısenǵalıev, Olımpıada chempıony, veloshabandoz Aleksandr Vınokýrov, sýretshi jáne antııadrolyq qozǵalys belsendisi Káripbek Kúıikov, kardıohırýrg Iýrıı Pıa, saıasattaný ǵylymynyń doktory jáne tarıhı kartalardy zertteýshi Muhıt-Ardager Sydyqnazarov, N. Tilendıev atyndaǵy memlekettik akademııalyq folklorlyq-etnografııalyq «Otyrar Sazy» orkestriniń bas dırıjeri Dınzýhra Tilendıeva, «Adam» laqap atymen álemdik tanymaldylyqqa ıe bolǵan estrada ánshisi Mırhıdaı Mırfarýh, álem rekordyn jańartqan alyp kúsh ıesi jáne Gınnes kitabynyń rekordshysy Sergeı Syrýlnıkov ıelengen bolatyn. Olar ózderine senip tapsyrylǵan mıssııany sátti oryndaýda jáne mádenı-gýmanıtarlyq salada, ekologııany qorǵaý, jasóspirimder sportyn damytý jáne basqa salalarda áleýmettik mańyzdy jobalardy júzege asyrýda.