Jarys kúndeligi

Short-trekten elimizdiń áıelder quramasy Beıjińdegi «World Tour» týrnıriniń kezeńdik saıysyn úshinshi orynmen qorytyndylady. Bizdiń komanda sapynda Málıka Ermek, Alına Ájiǵalıeva, Iаna Han, Olga Tıhonova óner kórsetti. Bas júldeni Ońtústik Koreıa oljalasa, Qytaı kúmiske qol sozdy. Sankt-Peterbýrtegi «Nashe delo» dep atalatyn promoýshen uıymdastyrǵan týrnırde Asyljan Baqytjanuly (15-4-1) kezinde UFC-de óner kórsetken reseılik Shámil Gamzatovpen (14-2) kúsh synasty. Úsh raýndtyń qorytyndysynda barlyq tóreshi bizdiń jigittiń myqtylyǵyn biraýyzdan moıyndady. 22 aqpanda Er-Rııadta orta salmaqtaǵy kásipqoı boksshylar – domınıkandyq Karlos Adames pen ulybrıtanııalyq Hamza Shırazdyń judyryqtasatyny belgili. Olar WBC-tiń altyn belbeýi úshin talasady. Osy kezdesýde jeńiske jetken sańlaq eki birdeı beldi nusqanyń chempıony Jánibek Álimhanulymen jekpe-jekke shyǵady. Bul jaıynda Saýd Arabııasynyń oıyn-saýyq isteri boıynsha bas basqarma tóraǵasy, bokstyń sýperınvestory Túrkı Ál ash-Sheıh málimdedi. Eger osy jospar júzege assa, onda jer-jahan jankúıerleri alapat aıqastyń kýási bolatyny anyq. Grepplıngten eki dúrkin álem chempıony Samat Aıtpanbetke «dopıng qoldandy» degen aıyp taǵyldy. Bul aqparat Halyqaralyq testileý agenttiginiń (ITA) resmı saıtynda jarııalandy. Eger ol rastalsa, onda 27 jastaǵy almatylyq arlan bıyl Astanada ótken dúnıejúzilik dodada oljalaǵan bas júldesinen aıyrylyp, birer jylǵa úlken sporttan shettetiledi. Al onyń altyny elimizdiń taǵy bir beldi greppleri Nurbek Myrzalınovke tabys etiledi. Dál sol sportshyny Samat elordada ótken jarystyń fınalynda utqan edi. Shveısarııanyń Non qalasynda fýtboldan 2025/26 jyl­dary uıymdastyrylatyn jasóspirimder (U-17) arasyndaǵy Eýro­pa chempıonatynyń birinshi kezeńiniń jerebesi tartyldy. Elimiz ­8-topqa tústi. Qarsylastarymyz – Horvatııa, Nıderland, Alba­nııa. 14 toptyń árqaısysynda birinshi, ekinshi oryndy ıelengen ­komandalar A lıgasynyń ekinshi kezeńine ótedi. Qalǵandary V lıgasynda baq synaıdy. Al jarystyń fınaldyq bóliginiń shymyldyǵy Estonııada túriledi. Astananyń «Barysy» QHL-dyń turaqty birinshiliginde qatarynan segizinshi ret jeńilis tapty. Juma kúni bizdiń hok­keıshiler Cherepoveste jergilikti «Severstalǵa» 3:5 esebimen utyldy. Jeksenbide Sankt-Peterbýrgtiń SKA-sy san soqtyryp ketti – 0:1.