Búgin elordadaǵy Barys Arena Pool olımpıadalyq basseıniniń bazasynda Táýelsizdik kúnine oraı júzýden ASTANA OPEN ashyq respýblıkalyq týrnıri bastaldy, dep habarlaıdy Egemen.kz.
Qalalyq Dene shynyqtyrý jáne sport basqarmasynyń uıymdastyrýymen jáne Astana qalasy ákimdiginiń qoldaýymen ótip jatqan ashyq birinshilikte jasóspirimder synǵa túsip jatyr.
«Bıylǵy dodaǵa 583 sportshy qatysyp jatyr. Olardyń 197-si – qyz, 386-sy – uldar. Básekege Astanadan bólek, Almaty qalasy, Pavlodar, Aqtóbe, Shyǵys Qazaqstan, Aqmola oblystarynan sportshylar keldi. Qatysýshylar ártúrli qashyqtyqtar boıynsha jeke jáne estafetalyq saıysta júldege talasady», dedi júzýden Astana qalasynyń aǵa bapkeri Anna Gershevıch.
Jarys jeńimpazdary men júldegerler 12-14 jeltoqsan kúnderi aralyǵynda anyqtalady.
Jarystyń birinshi kúni estafetalyq jarys, 50 metrge batterflıaı, 200 metrge brass, 100 metrge erkin júzý jáne 200 metrge shalqalaı júzý ádisi boıynsha órbıdi. Ekinshi jáne úshinshi kúnderi sporttyq básekede 50 metrge erkin júzý, shalqalaı júzý, brass, 100 metrge batterflıaı, shalqalaı júzý jáne brass, 200 metrge erkin júzý, batterflıaı, keshendi júzý boıynsha synǵa túsedi.
Ashyq birinshilikte úzdik kóringen sportshylar ulttyq quramaǵa kirýge múmkindik alatynyn aıta ketý kerek.