Qyzylordada dárigerler analız alý kezinde jańa týǵan náresteniń tabanyn kúıdirip alǵan, dep habarlaıdy Egemen.kz.
Oqıǵa Qyzylorda oblystyq perınataldyq ortalyǵynda bolǵan. Jábirlenýshi áıeldiń týysy Aıgerim Ábiltaevanyń aıtýynsha, birneshe kún buryn joǵary qan qysymy baıqalǵan júkti kelinin aýdan dárigerleri shuǵyl túrde oblystyq perınataldyq ortalyqqa jibergen. Qalada oǵan dereý «kesar tiligi» arqyly operasııa jasalǵan.
«Biz ony qalaǵa jibergenderine qatty qýanyp edik, óıtkeni munda dárigerlerdiń deńgeıi joǵary dep oıladyq. Biraq kelgende, ne onymen, ne dárigerlermen kezdesýimizge ruqsat bermedi. Tek náresteniń kývezde ekenin jáne onyń jaǵdaıy aýyr ekenin bildik. Birneshe kúnnen keıin kelinim jylap habarlasyp, náresteniń aıaǵyn kúıdirip alǵandaryn aıtty», dep jazdy áıel óz Facebook paraqshasynda.
(Foto: facebook.com/Aıgerim Ábiltaeva)
Medısınalyq qyzmetkerler baladan analız alý kezinde spırtpen tabanyn kúıdirip alǵany anyqtalǵan. Sonymen qatar, týysynyń aıtýynsha, dárigerler osy ýaqytqa deıin anasyna jórgekti aýystyrýǵa nemese náresteni ustaýǵa ruqsat bermegen.
«Kúndelikti tekseris jasaıtyn pedıatr qaıda qarady, reanımasııa bóliminiń jaýapty qyzmetkerleri ne istep otyr? Jaraǵa ınfeksııa túskenin kútti me, eger odan ári tarasa ne bolady? Nege buny eshkim oılamaıdy? Beıshara náreste jasandy tynys alý apparatyna qosylǵan, al endi myna jaǵdaı boldy! Biz kinálilerdi jaýapqa tartýdy talap etemiz!», dep jazdy ol.
Oblystyq perınataldyq ortalyq bul oqıǵa boıynsha ishki tekserý júrgizilip jatqanyn aıtty.
«Barlyq jaýapty qyzmetkerden kórsetilgen qyzmetter boıynsha aqparat jınaldy. Nárestege kútim jasaý kezinde qyzmetkerler tarapynan jiberilgen qatelikterge baılanysty tıisti sharalar qoldanylatynyn habarlaımyz», dep jazdy perınataldyq ortalyq qyzmetkerleri jazbaǵa pikir retinde.