Senat Tóraǵasy Máýlen Áshimbaevtyń qatysýymen Palata janyndaǵy Sarapshylar klýbynyń kezekti otyrysy ótti, dep habarlaıdy Egemen.kz.
Is-shara barysynda genderlik damý máseleleri talqylanyp, kedergilerdi eńserý jáne áıelderdiń áleýetin júzege asyrý jóninde usynystar aıtyldy jáne sarapshylar tarapynan eksklıýzıvti zertteýlerge nazar aýdaryldy. Al, shaqyrylǵan meımandar bıznes, qarjy, saıasat, áıelder quqyǵyn qorǵaý salalary boıynsha ózderiniń jumystary jáne ozyq tájirıbeleri týraly sóz qozǵady.
Statıstıkalyq málimetterge sáıkes Qazaqstanda áıel adamdar sany 10 mıllıonnan asady nemese 51 paıyzdan astam. Sondyqtan olardyń qaýipsizdigin qamtamasyz etý, quqyqtaryn qorǵaý jáne áleýetin tolyq iske asyrýǵa qajetti jaǵdaı jasaý eldiń damýy jolyndaǵy mańyzdy qadam sanalady.
«Qazirgi ýaqytta ekonomıkalyq sektorda áıelderdiń áleýeti jetkilikti deńgeıde emes. Aýyldyq jerlerdegi áıelderdiń ekonomıkalyq belsendiligi de áli tómen. Áıelderge qatysty zorlyq-zombylyq ta mańyzdy másele bolyp qalyp otyr. Sondyqtan Memleket basshysynyń bastamasymen Áıelderdiń quqyqtaryn jáne balalardyń qaýipsizdigin qorǵaý týraly zań qabyldandy. Bul osy saladaǵy jaǵdaıdy ózgertý jolyndaǵy mańyzdy qadam ekeni anyq. Sondaı-aq alıment tóleýge qatysty aıtarlyqtaı problemalar bar. Sonyń saldarynan júzdegen myń bala qajetti qarjylyq qoldaýdy ala almaı otyr deýge tolyq negiz bar. Sol sebepti, biz búginde osy máselelerdi qamtıtyn tıisti zań jobasymen jumys istep jatyrmyz», dep Máýlen Áshimbaev Palatanyń osy baǵyttaǵy zańnamalyq qyzmeti týraly aıtyp ótti.
Senattyń baspasóz qyzmetiniń málimetinshe sondaı-aq Senat Tóraǵasy depýtattardyń, memlekettik organdardyń jáne azamattyq qoǵamnyń úılesimdi jumysy áıelderge qatysty turmystyq zorlyq-zombylyq, kemsitýshilik jáne qoǵamdaǵy stereotıpterdi joıý sııaqty olardyń áleýetin iske asyrýǵa tusaý bolatyn kedergilerdi eńserýdi talap etetinine toqtaldy.
«Áıelderdiń ekonomıkalyq jáne saıası ómirge belsendi qatysýyna kedergi keltiretin negizgi sebepterdiń biri – olardyń qoǵamdaǵy róli týraly stereotıpterde bolyp otyr. Osy másele týraly baıypty oılanyp, taptaýryn qaǵıdalardy ózgertý úshin barlyq deńgeıde belsendi jumys júrgizý qajet. Áıelderge qatysty qasań oılarmen ómir súre beretin bolsaq, biz álemdik tendensııalardan qalyp qana qoımaı, ózimizdiń damýymyzǵa kedergi keltiremiz», dedi Senat Spıkeri.
Otyrys kezinde Sarapshylar klýbynyń múshelerimen qatar «Shevron» kompanııasynyń Eýrazııalyq jáne Tynyq muhıty óńiri boıynsha bas dırektory Zamıra Kanapıanova, «Otbasy bank» AQ Basqarma tóraǵasy Lázzat Ibragımova, «LULU Group» jobasynyń negizin qalaýshy Ásel Mashanova, advokat Janna Orazbahova, «Agromashholdıng KZ» AQ prezıdenti Dınara Shúkijanova jáne taǵy basqa sarapshylar sóz sóılep, genderlik damý, kedergilerdi eńserý, sondaı-aq, áıelderdiń áleýetin júzege asyrý máseleleri boıynsha pikirlerin bildirip, usynystaryn aıtty.