Táýelsizdik kúni qarsańynda Astana – Býrabaı baǵytynda qatynaıtyn jańa týrıstik elektr poıyzy jolǵa shyqty. Elimizde qurastyrylǵan poıyz eki aralyqty 2 saǵat 26 mınýtta júrip ótedi.
Elordadan jol tartqan poıyz júıtkigen kúıi Býrabaıǵa baryp bir-aq toqtaıdy. Týrıstik poıyz aptanyń seısenbi men sársenbiden basqa kúnderi kún saıyn qatynaıdy. Jańa transport 574 jolaýshyǵa arnalǵan. Jaıly oryndyqtar «Komfort +» eýropalyq standartyna sáıkes jasalǵan.
Memleket basshysy elimizde týrıstik salany damytý boıynsha kúsh-jigerdi jandandyrýdy, jańa marshrýttar quryp, ınfraqurylymdy jaqsartýdy tapsyrǵan bolatyn. Bul turǵyda jaıly ári zamanaýı kólik týrıst tartýda úlken mánge ıe. Alǵashqy saparyna shyqqan bul poıyz osy baǵytta atqarylǵan jumystardyń nátıjesi. Salatanatty shara barysynda «QTJ» UK» AQ basqarma tóraǵasynyń transformasııa jáne sıfrlandyrý jónindegi birinshi orynbasary Ánýar Ahmetjanov ulttyq kompanııa týrızm salasyn damytýǵa úlken mán berip otyrǵany jóninde áńgimeledi.
«Bıyl Alakól týrıstik baǵytynda ondaǵan poıyzdy iske qostyq. Ondaǵy vagondardyń barlyǵy salqyndatqysh, aýa baptaǵyshpen qamtylǵan. Sonyń nátıjesinde bıyl týrıstik oryndarǵa baratyn jolaýshylar tarapynan birde bir aryz-shaǵym bolǵan joq. Odan bólek, osy jyldyń qarasha aıynda Kólik jáne týrızm komıtetteriniń qoldaýymen Almaty – Túrkistan – Tashkent baǵytynda alǵashqy týrıstik poıyzdy jolǵa shyǵardyq. Bul – temirjol men týrıstik salanyń birigip jasaǵan jobasy. Onyń ereksheligi sol – jolaýshylar túngi ýaqytta jol júrip, kúndiz kórikti jerlerdi tamashalaıdy. Kelesi jyldyń 2 qańtarynan bastap týrıstik poıyz qaıtadan jolǵa shyǵyp, tolyqqandy bes kúndik týr uıymdastyrylady. Bul joly qalalar qataryna Samarqand ta qosyldy. Osyǵan uqsas poıyz О́zbekstan tarapynan bizge qaraı baǵyt alady. Kórshi el turǵyndaryna da elimizdiń mádenıetimen, kórikti jerlerimen tanysýyna múmkindik týady», deıdi Ánýar Ahmetjanov.
Alǵashqy saparyna shyqqan №7515/7516 týrıstik elektr poıyzy otandyq «ZIKSTO» zaýytynda óndirilgen. Poıyz sapa men qaýipsizdiktiń barlyq zamanaýı standartyna saı keledi. Jolaýshylardyń jaılylyǵy úshin poıyzda mıkroklımat júıesi, jyldam qýattaý úshin USB-rozetkalar, oıyn-saýyq kontentine qoljetimdi Wi-Fi jelisi jáne velosıpedterge arnalǵan bekitkishter ornatylǵan. Múmkindigi shekteýli jolaýshylarǵa arnaıy kótergishter men arbaǵa arnalǵan oryndar qarastyrylǵan. Elektr poıyz 6 zamanaýı vagonnan turady. Jobany «О́nerkásipti damytý qory» AQ qarjylandyrdy.
Týrıstik poıyzdyń dızaıny Astananyń kórikti jerleri men Býrabaıdyń ásem tabıǵatyn beıneleıdi. Jobany júzege asyrý maqsatynda «QTJ» UK» AQ, Kólik mınıstrligi, Týrızm jáne sport mınıstrligi, Astana men Aqmola oblysy ákimdikteri, sondaı-aq «Visit Aqmola» men «Astana damý ortalyǵy» JShS birlese jumys istegen.
Jańa poıyzdyń bılet quny «Nurly Jol» stansasynan – 2 770 teńge, «Astana» stansasynan – 2 548 teńge.