«Amanat» partııasynyń músheleri men «Jastar rýhy» jastar qanatynyń belsendileri Aqtaý mańyndaǵy ushaq apatynan zardap shekkenderge qan tapsyrý úshin Astanadaǵy qan ortalyǵyna bardy, dep habarlaıdy Egemen.kz.
«Ushaq apaty saldarynan jaqyndaryn joǵaltqan adamdarǵa shyn júrekten kóńil aıtamyz. Búgin bizdiń partııalastar zardap shekkenderge qajetti qan tapsyryp júr. Barlyǵynyń tezirek saýyǵyp ketýin tileımiz», dedi «Amanat» partııasy «Jastar rýhy» jastar qanatynyń tóraıymy Aqerke Eskendirova.
Eske salaıyq, búgin Bakýden Groznyıǵa (J2-8243) ushqan Ázerbaıjan áýe joldarynyń Embraer 190 jolaýshylar ushaǵy Aqtaý áýejaıynan úsh shaqyrym jerde apatqa ushyraǵan.
Tótenshe jaǵdaılar mınıstrligi ushaq bortynda 69 adam, onyń ishinde 5 ekıpaj múshesi bolǵanyn habarlady. 28 adam aýrýhanaǵa jatqyzyldy, onyń ekeýi bala ekeni málim boldy.