21 jeltoqsan kúni Semeı qalasynda muǵalim shyrshany bezendirý kezinde bıikten qulap, zardap shekken edi. Búgin Úkimet otyrysynan keıin ótken baspasóz konferensııasynda Oqý-aǵartý mınıstri Ǵanı Beısembaev muǵalimniń qazirgi ahýalyn aıtty, dep jazady Egemen.kz.
Shyrsha bezendirý kezinde bıikten qulaǵan muǵalim Qýat Aıtqalıev bassúıegi synyp, mıyna zaqym kelgen. Dárigerler oqıǵa bolǵan kúni oǵan ota jasaǵan.
Sol kúnnen beri aq halattylardyń baqylaýynda bolǵan muǵalim búgin aýrýhanadan shyqty. Bul týraly Ǵanı Beısembaev aıtty.
Mınıstrdiń sózinshe, Qýat Aıtqalıev tolyqtaı saýyǵyp shyqqan.
«Bul máseleni únemi baqylaýymda ustap otyrmyn. Qazir bul máselemen ákimdik aınalysyp jatyr. Kináliler jazalandy. Tekserý tolyq aıaqtalǵannan keıin tıisti shara qoldanylady», dedi Oqý-aǵartý mınıstri.