Ulytaý oblysy ekologııa departamentiniń basshysy 2,5 mıllıon teńge para aldy degen kúdikke ilindi, dep habarlaıdy Egemen.kz tilshisi Sybaılas jemqorlyqqa qarsy is-qımyl agenttiginiń baspasóz qyzmetine silteme jasap.
«2025 jylǵy 6 qańtarda Ulytaý oblysy boıynsha sybaılas jemqorlyqqa qarsy qyzmet oblystyq ekologııa departamentiniń basshysyn ustady. Sheneýnik ekologııa salasyndaǵy ruqsat qujattaryn bergeni úshin kásipkerden 2,5 mıllıon teńge kóleminde para aldy degen kúdikke ilindi», delingen habarlamada.
8 qańtarda ol sottyń sanksııasymen qamaýǵa alyndy. Tergeý jalǵasyp jatyr, basqa adamdardyń qatysy bar-joǵy tekserilip jatyr.
2024 jylǵy 26 tamyzda kúdikti bıznesti qorǵaý jobasy aıasynda kásipkerlik qyzmetke aralasqany úshin ákimshilik jaýapkershilikke tartylǵan. Ol kásipkerge qorshaǵan ortany qorǵaý jónindegi is-sharalar josparynyń oryndalýy týraly toqsan saıynǵy esep berý týraly zańsyz talaptar qoıǵan.
Qylmystyq-prosestik kodekstiń 201-babyna sáıkes ózge aqparat jarııa etilmeıdi. Konstıtýsııanyń 77-baby 3-tarmaǵynyń 1-tarmaqshasyna jáne Qylmystyq-prosestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.