Almaty oblysy Kegen aýdanynyń Jalaǵash aýylynda shetelge zańsyz asqan aqsha esebinen sport kesheni salynady, dep jazady Egemen.kz.
Úkimet osy áleýmettik nysannyń qurylysyna 1,1 mlrd teńge bólip otyr.
Sport kesheni jalpy dene shynyqtyrý daıyndyǵy boıynsha oqý-jattyǵý sabaqtaryna jáne jarystar ótkizýge qolaıly etip salynbaq. Onda boks, kúres jáne basqa da sport túrimen aınalysýǵa arnalǵan birneshe zal qarastyrylǵan.
Úkimettiń dereginshe, byltyr elimizde salynǵan 90 dene shynyqtyrý-saýyqtyrý kesheniniń basym bóligi aýyldyq jerlerde ornalasqan.
Bıyl osy baǵytta 113 jańa nysan salý jáne jumys istep turǵan 26 sport mekemesin rekonstrýksııalaý josparlanǵan.
«Búgingi tańda Úkimet Arnaýly memlekettik qordan áleýmettik mańyzy bar nysandardy salýǵa shamamen 50,6 mlrd teńge bóldi. Olardyń qatarynda 4 mektep, onyń ishinde bireýi mýzykalyq mektep, sport kesheni, kópsalaly aýrýhana kesheni, jataqhana, 2 balabaqsha bar», delingen Úkimet habarlamasynda.