Qyzylorda oblysynda sot eki turǵynǵa qatysty zańsyz kıik atý isi boıynsha úkim shyǵardy, dep habarlaıdy Egemen.kz.
Joǵarǵy sottyń baspasóz qyzmeti málimetinshe, Qyzylorda oblysynyń eki turǵyny zańsyz kıik aýlaý úshin kólikpen shyǵyp, janýarlardyń úıirin qýyp, olarǵa oq atqan. Qylmys qashan bolǵany sotta naqtylanbady.
Kólikti tabıǵatty qorǵaý ınspektorlary, orman sharýashylyǵy jáne janýarlar dúnıesi ınspeksııasynyń qyzmetkerleri toqtatqan. Oqıǵa ornynan 30-dan astam kıik týshasy jáne 5 basy tabyldy. Saraptama qorytyndysyna sáıkes, memleketke 80 mıllıon teńgeden astam shyǵyn keltirilgen.
Qyzylorda oblysynyń qylmystyq ister jónindegi mamandandyrylǵan aýdanaralyq soty (QIJMAS) janýarlardy zańsyz aýlaý isi boıynsha aıyptalǵan eki azamattyń isin qarady. Olarǵa qarý men kólik paıdalanyp, aıtarlyqtaı zııan keltirgeni úshin (Qylmystyq kodekstiń 337-babynyń 6-bólimi 2-tarmaǵy) aıyp taǵyldy. Sottyń málimetinshe, qylmystyq áreketter usynylǵan qujattarmen dáleldendi.
Sot aıyptalýshylardy kináli dep tanyp, 6 jáne 7 jylǵa bas bostandyǵynan aıyrdy. Olar tıisinshe 7 jáne 8 jyl boıy ań aýlaýmen aınalysa almaıdy.
Sottalǵandardan 77 mıllıon teńgeden astam materıaldyq shyǵyndy óteý týraly sheshim shyǵaryldy. Olar memleketke 3 mıllıon teńge qaıtardy. Qyzylorda oblystyq soty úkimdi ózgerissiz qaldyrdy.