Prezıdent Qasym-Jomart Toqaev «Abý Dabıdiń ornyqty damý aptalyǵynyń» ashylý saltanatyna jáne ornyqty damý salasyndaǵy Zayed Sustainability Prize syılyǵyn tapsyrý rásimine qatysty, dep habarlaıdy Egemen.kz Aqordanyń baspasóz qyzmetine silteme jasap.
Is-sharaǵa qatysýshylar qatarynda Birikken Arab Ámirlikteriniń Prezıdenti sheıh Muhammed ben Zaıd Ál Nahaıan, Ázerbaıjan Prezıdenti Ilham Álıev, Rýanda Prezıdenti Pol Kagama, О́zbekstan Prezıdenti Shavkat Mırzııoev, Malaızııa Premer-mınıstri Anýar Ibragım, Jańa Zelendııa Premer-mınıstri Krıstofer Lakson, Fınlıandııa Premer-mınıstri Petterı Orpo, sondaı-aq saıasatkerler, qaıta jańartylatyn energııa kózderi, tehnologııalyq damý jáne ınnovasııa salalaryndaǵy kóshbasshylar, ınvestorlar men kásipkerler bar.
Sammıt aıasynda Memleket basshysy Qasym-Jomart Toqaev sóz sóıleıdi.
«Abý Dabıdiń ornyqty damý aptalyǵy» (ADSW) – ornyqty damý jáne klımat ózgerisine qarsy kúres máselelerine arnalǵan jetekshi jahandyq alańdardyń biri. Jıyn jasyl tehnologııa men energııanyń qaıta jańartylatyn kózderine ınvestısııa salýdy yntalandyrýǵa, BUU-nyń ornyqty damý maqsattaryna jetý úshin ınnovasııalyq sheshimder izdeýge baǵyttalǵan. Bıyl forým «Bolashaqpen baılanys: Ornyqty damýdy jedeldetý» (The Nexus of Next. Supercharging Sustainable Progress) taqyrybynda ótedi.