Qaraǵandyda esirtki jarnamasyn taratqan qyz balalar ustaldy, dep habarlaıdy Egemen.kz.
Qaraǵandy qalasynda Oktıabr polısııa bóliminiń ýchaskelik ınspektorlary ákimshilik aýmaqty aralaý kezinde turǵyn úılerdiń biriniń esigine jańadan japsyrylǵan QR-kody bar paraqshany anyqtady. Tekserý nátıjesinde siltemeniń esirtki saýdasyna qatysty Telegram-arnasyna qatysy bary belgili boldy.
Jedel áreket etý nátıjesinde polıseıler 14 jáne 15 jastaǵy kámeletke tolmaǵan eki qyz balany ustady. Ustalǵandardyń qolynda áli jabystyrylmaǵan 60-qa jýyq paraqsha tárkilendi.
Qyzdardyń aıtýynsha, olar bul jumysty habarlandyrý arqyly tapqan. Árbir paraqsha úshin olarǵa 70 teńge tólengen. Mektepte buǵan deıin mundaı is-áreketter úshin qylmystyq jaýapkershilik kózdeletini boıynsha birneshe ret eskertý jasalǵanyna qaramastan, qyzdar bul jarnamanyń zııansyz ekenine sendirilgenin aıtty. Olar siltemeniń halyq tutynatyn taýarlar satatyn ınternet-dúkenge aparatynyn kórsetken.
«Qazirgi ýaqytta qozǵalǵan qylmystyq is aıasynda zańsyz materıaldardy taratýdy uıymdastyrǵan adamdardy anyqtaý boıynsha tergeý amaldary júrgizilip jatyr.
Esirtki jarnamasymen kúresý máselesi ózekti bolyp qala beredi. 2024 jyly Qaraǵandy oblysynyń polıseıleri eriktilermen jáne oblystyq prokýratýra qyzmetkerlerimen birlesip, esirtki jarnamasyn joıýǵa baǵyttalǵan 500-den astam is-shara ótkizdi. Nátıjesinde 13 myńǵa jýyq sýret joıylyp, zańsyz tabys kózderin usynǵan 271 áleýmettik jeli akkaýnty buǵattaldy.
2025 jyldyń basynan beri bul jumys belsendi túrde jalǵasyp keledi. Qańtardyń alǵashqy eki aptasynda 11 is-shara ótkizilip, 36 jańa graffıtı joıyldy jáne esirtki taratýǵa qatysty 21 mekenjaı jabyldy», delingen PD habarlamasynda.