Májilis depýtaty Qaırat Balabıev elimizde sý qoımalaryn salý ýaqyty nelikten sozylyp ketetinin túsindirýdi talap etti, dep jazady Egemen.kz.
«Aýyl sharýashylyǵy mınıstrligi elimiz boıynsha 41 avarııalyq sý qoıma men gıdrotehnıkalyq nysandardyń kúrdeli jóndeýden ótkizilip jatqanyn, sońǵy 5 jylda 15 jobanyń aıaqtalǵanyn, bıyl qalǵan 19-yn tapsyratynyn aıtqan edi. 10 jyldan beri salynbaı kele jatqan ne degen bitpeıtin 20 sý qoımasy?!», dedi depýtat Premer-mınıstrdiń orynbasary Qanat Bozymbaevqa joldaǵan saýalynda.
Qaırat Balabıev byltyr kóktemdegi sý tasqynyna da kópten beri sóz júzinde qalyp jatqan sý qoımalarynyń salynbaýy sebep bolǵanyn alǵa tartty.
«Sý tasqyny apattarynyń taǵy bir sebebi – sý qoımalary men kanaldardyń kópshiligi jekemenshikke ótip ketkeni. Bir ǵana Túrkistan oblysynda 4 sý qoımasy men 105 kanal jeke menshikte. Bul – egin jáne mal sharýashylyǵymen aınalysatyn Arys, Jetisaı, Ordabasy, Otyrar, Saıram, Saryaǵash, Sozaq, Túlkibas jáne Shardara aýdandarynda ornalasqan jalpy uzyndyǵy 335 shaqyrymdy quraıtyn sý arnalary», dedi Májilis depýtaty.
О́ńirde egis naýqany bastalǵanda sý máselesi ýshyǵa túsedi. Depýtat jekeniń qolyndaǵy sýǵa qol jetkize almaǵan sharýalardyń isi de turalaıtynyn tilge tıek etti.
«Osy resýrstardy egelenip alǵandar sharýalardy sýdan taryqtyryp, áldeqandaı bolady. Olarmen daýlasyp júrgende jaz da bitedi. Búginde Prezıdent tapsyrmasyna sáıkes oblys ákimdigi tarapynan jekemenshik sý ıeleriniń arasynda sharýalardy sýdan taryqtyrmaý sharalary júrgizilip jatyr. Buǵan deıin bolǵan apattardy zerdeleı kele, aýyl sharýashylyǵyna óte-móte qajetti sý qoımalary men kanaldardyń el ıgiligi úshin jumys istegeni tıimdi dep esepteımin», dedi Qaırat Balabıev.
Depýtat jekege ótip ketken sý qoımalaryn memleket menshigine qaıtarýdy nemese sharýashylyqtarǵa der kezinde jáne arzan baǵada sýmen qamtamasyz etý sharalaryn qarastyrýdy surady.