Taıaýda oblys ortalyǵynyń Saryarqa shaǵyn aýdanynda «Jaıly mektep» ulttyq jobasy boıynsha salynǵan, 1500 oqýshyǵa arnalǵan zamanaýı bilim ordasy paıdalanýǵa berildi.
Kóńilge dem beretini, jaıly mektep jergilikti ult tilinde jumys isteıdi. Mektep dırektorynyń mindetin atqarýshy Áıgerim Qoshanovanyń aıtýynsha, munda oqýshylarǵa bar jaǵdaı jasalǵan. Oqýshylardyń jas ereksheligine baılanysty 4 sport zal, zaman suranysyna oraı barlyq qajetti qural-jabdyqtarmen jasaqtalǵan pán kabınetteri, saltanat zaly, ishi keń ashanasy, kitaphanasy, horeografııa zaly, medısınalyq blogy bar. Ár synypta 25 oqýshydan oqıtyn 60 synyp jasaqtalmaqshy. Mektepte jalpy sany 350-den astam kabınet bar.
«Jaıly mektepti salǵan merdiger kompanııa – «Integra Construction KZ» jaýapkershiligi shekteýli seriktestigi. Mekteptiń ereksheligi, munda balalardyń qyzyǵýshylyǵyn týǵyzatyn STEM laboratorııa, robototehnıka kabınetteri men hımııa, fızıka zerthanalary bar. Mektep bir aýysymmen ǵana jumys isteıdi, túske deıin oqýshylar sabaq oqysa, tústen keıin qosymsha úıirmelermen qamtylady. «Jaıly mektep» baǵdarlamasy aıasynda iske asyrylǵan bul jobanyń quny 6 mıllıard teńgeden asady», dedi óz sózinde merdiger kompanııanyń bas dırektorynyń strategııalyq jobalar jónindegi orynbasary Álibek Qaırolla.
Memleket basshysynyń bastamasymen qolǵa alynǵan ulttyq joba sheńberinde oblysta birneshe «Jaıly mektep» qurylysynyń bastalýy bolashaqqa jasalǵan qamqorlyq.
Kókshetaý