Aýstralııanyń Melbýrn qalasynda ótip jatqan Australian Open-2025 týrnıriniń ekinshi aınalymynda da tennısshi qyzdarymyz jeńiske jetti.
Elimizdiń birinshi raketkasy Elena Rybakına 17 jastaǵy amerıkalyq Iva Iovıchti aıqyn basymdyqpen utty. Ǵalamdyq reıtıngte 191-satyda turǵan qarsylasy jerlesimizdiń tegeýrinine tótep bere almady, eki settegi esep – 6:0, 6:3. Elena endi úshinshi aınalymda ýkraınalyq Daıana Iаstremskaıanyń qarymyn baıqap kóredi.
Elena Rybakına úsh jyl burynǵy bıigine shyǵa ala ma? 2022 jyly «Ýımbldon» týrnırinde top jaryp, «úlken dýlyǵa» sanatyndaǵy mártebeli dodanyń úzdigi atandy. 2023 jyly Australian Open týrnıriniń fınalyna shyqty. Byltyr Melbýrndegi tartystyń ekinshi aınalymynda kútpegen jerden reseılik Anna Blınkovaǵa ese jibergen bolatyn.
Taǵy bir jerlesimiz Iýlııa Pýtınseva da jeńistiń júlgesin jalǵastyryp, úshinshi aınalymǵa ótti. Qytaılyq Chjan Shýaıdy ol 6:2, 6:1 nátıjesimen jeńdi. Kelesi qarsylas – reseılik Darıa Kasatkına. Reseılik tennısshi álemniń 10-raketkasy sanalsa, Pýtınseva 23-satyda tur.