Dzıýdo kúresinen ótken jyldyń úzdigi atalymy, ıaǵnı IJF Judo Awards 2024 syılyǵynyń short-paraǵy jarııalandy. Halyqaralyq dzıýdo federasııasy (IJF) usynǵan tizimde byltyrǵy Parıj jazǵy Olımpııa oıyndarynyń jeti birdeı chempıony bar bolatyn. Daýys berýdiń nátıjesinde short-paraqqa úsh úzdiktiń esim-soıy jazyldy.
Olar: jerlesimiz Eldos Smetov, ázerbaıjandyq Hıdaıat Geıdarov, grýzın Lasha Bekaýrı. Osy úsh oǵlannyń ishinen Halyqaralyq dzıýdo federasııasynyń sarapshylary úzdikti anyqtaıdy. Saltanatty marapattaý rásimi 1-2 aqpan kúnderi Parıjde ótetin bıylǵy alǵashqy mańyzdy doda Grand Slam básekesinde tabys etiledi.
Eldos Parıj jazǵy Olımpııa oıyndarynda 60 kg salmaqta top jarsa, 2021 jyly Tokıo tórinde ótken tórtjyldyq alamanynda qola medal enshiledi, 2016 jyly Rıo jazǵy Olımpıadasynyń fınalynda súrinip, kúmis júldeni oljalady. Ázerbaıjandyq Hıdaıat Geıdarov Parıj jazǵy Olımpıadasynda 73 kg salmaqta top jaryp, tuńǵysh ret Olımpıada medalin ıelendi. Al 24 jastaǵy grýzın Lasha Bekaýrıdiń bul ekinshi alamany. 2021 jyly Tokıoda, byltyr Parıjde 90 kg salmaq dárejesinde barlyq qarsylasyn alyp ta, shalyp ta aýdaryp tastap, altyn medal enshiledi.