Ulttyq banktiń Aqsha-nesıe saıasaty komıteti bazalyq mólsherlemeni burynǵy 15,25% deńgeıinde qaldyrý týraly sheshim qabyldady. Qazir eldegi jyldyq ınflıasııa deńgeıi – 8,6%. Negizgi maqsat – 5%-ǵa tómendetý.
Ulttyq bank tóraǵasy Tımýr Súleımenovtiń aıtýynsha, syrtqy ortada baǵa qysymy kúsheıip tur.
«Oǵan elimizdiń negizgi saýda-seriktesi – Reseıde ınflıasııanyń kúsheıýi sebep. Onyń ústine, keıingi aılarda jetekshi ekonomıkalarda ınflıasııa údep keledi. Sonyń ózi álemdegi mólsherlemelerdiń uzaq ýaqyt joǵary bolyp qalýyna sebep. Bul ózgerister dollardyń nyǵaıýyna áser etti. Damýshy elderdiń valıýtalaryna, onyń ishinde teńgege de qysym kúsheıip keledi. Ishki ekonomıkadaǵy ınflıasııalyq faktorlardy atasaq, olar – fıskaldyq yntalandyrýdyń jalǵasýy, turǵyn úı-kommýnaldyq qyzmetter tarıfiniń ósýi, teńgeniń álsireýi jáne tutynýshylyq suranystyń turaqty artýy», deıdi UB basshysy.
Onyń sózinshe, bas bank negizgi makroekonomıkalyq kórsetkishterdiń boljamyn jańarta otyryp, kelesi sheshimde aqsha-kredıt saıasatyn qatańdatý sharalary qanshalyqty qajet bolatynyn muqııat baǵalaıdy.
«Qajet bolǵan jaǵdaıda ınflıasııalyq kútýlerdi turaqtandyrý ári ınflıasııany turaqty quldyraý traektorııasyna maqsatty 5%-ǵa deıin qaıtarý úshin meılinshe tezirek qatań sheshimder qabyldaýǵa daıyn ekenimizdi aıta ketkim keledi», dedi.
2024 jyldyń jeltoqsanynda ınflıasııa 8,6%-ǵa deıin jedeldep, boljamdy 8–9% deńgeıinde qalyptasty. Nátıje bir qaraǵanǵa turaqty bolyp kóringenimen, onyń ósýine birneshe mańyzdy faktor yqpal etti. Eń aldymen, qyzmet kórsetý salasyndaǵy baǵanyń kúrt artýy baıqaldy. Kommýnaldyq tólemder, kólik, bilim jáne densaýlyq saqtaý salalaryndaǵy baǵa ósimi turǵyndardyń shyǵynyn arttyryp, jalpy ınflıasııanyń joǵarylaýyna túrtki boldy.
Sonymen qatar azyq-túlikke jatpaıtyn taýarlardyń qymbattaýy da mańyzdy ról atqardy. Bul sanatqa turmystyq tehnıka, kıim, janarmaı, qurylys materıaldary sııaqty ónimder kiredi. Baǵanyń ósýine ishki jáne syrtqy naryqtaǵy ózgerister, ásirese teńgeniń qunsyzdanýy áser etti. Importtyq taýarlar baǵasynyń ósýi jergilikti naryqqa da qysym túsirdi.
Taǵy bir aıtarlyqtaı sebep – «Tarıfti ınvestısııaǵa aıyrbastaý» baǵdarlamasy aıasynda kommýnaldyq tarıfterdiń kóterilýi. Álemdik azyq-túlik baǵasynyń ósýi men Reseıdegi ınflıasııanyń kúsheıýi de el ekonomıkasyna qosymsha qysym jasady.