Pavlodar oblysynyń Maı aýdanynda marketpleıste qosymsha nápaqa taýyp kelgen memlekettik qyzmetkerdi jumysynan ketirdi, dep habarlaıdy Egemen.kz.
Bul týraly QR Memlekettik qyzmet isteri agenttiginiń departamenti júrgizgen tekserýden keıin belgili boldy. Qazaqstan Respýblıkasy Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń Maı aýdandyq aýmaqtyq ınspeksııasynyń bas mamany jumyssyz qalǵany habarlandy.
«Agenttiktiń habarlaýynsha, 34 jastaǵy bas maman áleýmettik jelilerde onlaın saýda platformalary arqyly taýarlarǵa óz betinshe tapsyrys berýge úıretý maqsatynda jarnamalar jarııalaǵan. Osyǵan baılanysty salada bir jyl jumys istegen memqyzmetker qyzmetinen bosatyldy», dep jazady pavlodarnews.kz.
«Qazaqstan Respýblıkasynyń memlekettik qyzmeti týraly» Zańǵa sáıkes, laýazymdy tulǵanyń oqytýshylyq, ǵylymı jáne ózge de shyǵarmashylyq qyzmetten basqa aqyly qyzmetpen aınalysýǵa quqyǵy joq.
Eske salaıyq, buǵan deıin Saýda jáne ıntegrasııa mınıstri Arman Shaqqalıev sheteldik ınternet-dúkenderge jańa erejeler engizýdi usynǵan bolatyn. Olarǵa Wildberries jáne Ozon kiredi.