Shekara shebindegi shalǵaı aýdandardyń halqyn turaqtandyramyz desek, eń áýeli medısına salasy sapaly bolýǵa tıis. Nege deseńiz, kópshilik em izdep qala jaǵalaıdy. Úı-jaıy yńǵaılansa, kóship ketisedi. Al em-dom alý qoljetimdi bolsa, kópshilik jyly ornynan qozǵala qoımaıdy. Osy oraıda ótken jyly aýdan mártebesin qaıta alǵan Katonqaraǵaı aýdanynyń medısına salasy úlgi etýge turarlyq.
Aýdan ortalyǵyndaǵy úsh qabatty aýrýhanada terapııa, juqpaly aýrýlar, balalar, hırýrgııa bólimderi táýlik boıy jumys istep tur. Stasıonarynda jylyna 2000-ǵa taıaý naýqas emdeledi. Birqatar operasııany jedel jasaýǵa da múmkindik bar. Máselen, soqyrishek, asqazannyń tesilgen oıyq jarasy, jatyrdan tys júktilik syndy operasııany aýrýhanada jasaı beredi. Jedel járdem bólimi qyzmetkerleri 4-sanattaǵy shaqyrtýlarǵa, ózderi habarlasqan naýqastarǵa táýlik boıy, demalys, mereke kúnderi medısınalyq qyzmet kórsetedi.
Aýdandyq aýrýhananyń bas dárigeri Gúlmıra Sákenova málim etkendeı, aýyl halqyna kórsetiletin medısınalyq qyzmetteriniń sapasyn arttyrý maqsatynda Qabyrǵa, Jańaúlgi, Qaıyńdy, О́rnek, Aqmaral, Qyzyl Juldyz aýyldarynyń medısınalyq pýnktterine kúrdeli jóndeý júrgizildi. Sonymen qatar «Aýyldaǵy densaýlyq saqtaýdy jańǵyrtý» qanatqaqty ulttyq jobasy aıasynda Barlyq aýylynda zamanaýı standarttarǵa saı jańa medısınalyq pýnkttiń qurylysy júrip jatyr. Eńbek, Arshaty, Jazaba aýyldaryndaǵy medpýnktterge de kúrdeli jóndeý qajet. Reti kelse, qaıta salǵan durys dep esepteıdi bas dáriger.
– Múmkindigimizge qaraı alys aýyldardaǵy turǵyndarǵa da kómek kórsetip kelemiz. Katonqaraǵaı aımaǵynda tirkelgen halyq sany 9 104 adamdy quraıdy, mekemeniń qyzmet kórsetý radıýsy – 120 shaqyrym. Turǵyndar tarapynan eshqandaı aryz-shaǵym joq, – deıdi G.Sákenova.
Aýdandaǵy medısınalyq kómek kórsetýge arnalǵan emdeý, aldyn alý mekemelerine ortaq, táýlik boıy jumys isteıtin 40 tósekke, kúndizgi stasıonarlyq 30 tósekke arnalǵan aýrýhana bar. Sonymen qatar Aqsý, О́rel, Aqqaınar aýyldarynda dárigerlik ambýlatorııa jumys istep tur. Basqa da aýyldarda 17 medısınalyq pýnkt bar. 3 dárigerlik ambýlatorııa sanıtarlyq avtokóliktermen qamtamasyz etilgen. Alaıda avtokóliktiń birqatary uzaq jyl boıy qoldanysta bolǵandyqtan, tehnıkalyq jaǵdaıyn qalypty ustap otyrýda úlken qarjylyq shyǵyndar bar ekenin alǵa tartady bas dáriger.
Mekemedegi 23 dárigerdiń tórteýi joǵary sanatty. Qosymsha hırýrg, rentgenolog, okýlıst, akýsher-gınekolog, ınfeksıonıst syndy mamandar qajet. Bas dárigerdiń aıtýynsha, rentgenolog qashyqtan jumys isteýge májbúr bolyp otyrsa, akýsher-gınekolog dárigeri zeınet demalysynda.
– Maman tapshylyǵy bar. Máseleni sheshý, aýyldyq eldi mekenderge jas mamandardy jumysqa tartý úshin aýrýhana janynan eki páterli turǵyn úı, bir rettik qarjylaı kómek beriledi. «Dıplommen aýylǵa» kelemiz degen mamandarǵa esigimiz ashyq, – deıdi bas dáriger.
Aýrýhana qajetti medısınalyq jabdyqtarmen qamtamasyz etilgen. О́tken jyly oblys bıýdjeti esebinen bólingen 29 mln 422 983 teńgege jańadan 6 dana medısınalyq apparat, atap aıtqanda, 12 arnaly elektrokardıograf, qan qysymyn baqylaý júıesi, holter, aýdıo-smart, spırometr, fetaldy monıtor satyp alyndy. Sonymen qatar sút bezi obyrynyń qaterli isigin erte anyqtaýǵa baǵyttalǵan sharalardy júzege asyratyn avtomatty rentgenmammografııalyq apparaty men oǵan qajetti sıfrlyq júıe ornatylǵan. Bıylǵy jyly da qajetti medısınalyq qural-jabdyqtarmen, qondyrǵylarmen qamtamasyz etýdi jalǵastyrý kózdelip otyr.
Aýrýhanada konsýltatıvtik dıagnostıkalyq qyzmetter de jolǵa qoıylǵan. Munda nevropatolog, endokrınolog, stomatolog, profpatolog, hırýrg, onkolog, psıhıatr-narkolog, ınfeksıonıst, dermatovenerolog mamandar qyzmet kórsetedi. Mamandar aıyna 3 myńnan astam qabyldaý júrgizedi.
Aýrýhana bazasyndaǵy zerthanada gematologııalyq, bıohımııalyq, mıkrobıologııalyq, ımmýnologııalyq, jalpy klınıkalyq zertteýler júrgiziledi. Qan, onyń komponentterin quıý kabıneti de jumys istep tur. Munda jylyna 15-ten artyq adamǵa qan, 250 den astam adamǵa qan almastyrǵyshtar quıylady. Aýrýhanada ońaltý qyzmetteri de bar. Arnaıy bilimdi medısına qyzmetkerleri massaj ǵana emes, emdik-fızıkalyq jattyǵý terapııasyn da ótkizedi. Biraq arnaıy trenajerlar, sporttyq qural-jabdyqtar, psıho-fızıkalyq kúıdi jaqsartatyn kabınetter qarastyrylmaǵan.
Eń negizgi máseleniń biri – túkpirdegi aýyldarda ınternettiń joqtyǵy nemese álsizdigi. Sonyń saldarynan halyqqa kórsetilgen medısınalyq derekterdi toltyrý úshin qyzmetkerler aptasyna úsh ret Katonqaraǵaı aýylyna kelip-ketýge májbúr. Qoryta aıtqanda, aýdanda halyqtyń densaýlyǵyn saqtaý baǵytyndaǵy júıeli jumystar tynymsyz atqarylyp jatyr.
Shyǵys Qazaqstan oblysy,
Katonqaraǵaı aýdany