Memlekettik qyzmet isteri agenttiginiń tóraǵasy Darhan Jazyqbaı Sıngapýrde ótken memlekettik basqarý kóshbasshylarynyń jahandyq forýmyna jáne Jahandyq úkimettik sammıtke qatysty. Is-shara Sıngapýr, Kanada, Ulybrıtanııa, Moldova, Estonııa, Mońǵolııa elderiniń memlekettik qyzmet salasyndaǵy túrli qurylym basshylary jáne joǵary laýazymdy ókilderiniń qatysýymen ótti.
Forýmda memlekettik qyzmette jasandy ıntellekt múmkindikterin paıdalaný men sıfrlyq transformasııany júzege asyrý, talanttardy irikteý, memlekettik qyzmetshiler arasynda joǵary ádep standarttaryn qalyptastyrý, adamı resýrstardy basqarý máseleleri talqylandy.
Paneldik sessııada sóz sóılegen MQIA tóraǵasy Darhan Jazyqbaı agenttikti tolyqqandy strategııalyq HR ınstıtýtqa aınaldyrý boıynsha Memleket basshysy Qasym-Jomart Toqaev alǵa qoıǵan mindetti júzege asyrý aıasynda atqarylyp jatqan jumystarǵa toqtalyp, memlekettik qyzmette rekrýtıng ádisterin qoldaný, kadrlyq áleýetti arttyrý jáne talanttardy tartý, irikteýdiń sıfrlyq júıesin engizý, bilikti mamandardy memlekettik qyzmetke konkýrstyq irikteýsiz qabyldaý, memlekettik qyzmettiń gıbrıdtik modelin qalyptastyrý boıynsha elimizdiń tájirıbesimen bólisti.
Qatysýshylar memlekettik qyzmette adam resýrstaryn basqarý, jasandy ıntellekt múmkindikterin paıdalanýǵa qatysty tájirıbelerdi ortaǵa salyp, jasandy ıntellekt salasyndaǵy ınnovasııalar úshin «qolaıly orta» qurý, ony durys qoldanýdy qamtamasyz etý máselelerine nazar aýdardy.
Sheteldik sarapshylar Qazaqstannyń talantty jastardy, bilikti mamandardy memlekettik qyzmetke tartý jáne olardy turaqtandyrý, memlekettik qyzmetke qabyldaýdy sıfrlandyrý, memlekettik qyzmettiń gıbrıdtik modelin qalyptastyrý tájirıbesine qyzyǵýshylyq tanytty.
Issapar aıasynda Memlekettik qyzmet isteri agenttiginiń tóraǵasy Darhan Jazyqbaı Sıngapýrdyń Memlekettik qyzmet basshysy Leo Ippen eki jaqty kezdesý ótkizdi. Kezdesýde Sıngapýr memlekettik qyzmet kolledji men QR Prezıdenti janyndaǵy Memleket basqarý akademııasy arasyndaǵy ózara túsinistik memorandýmy aıasynda memlekettik qyzmetshilerdiń áleýetin arttyrý boıynsha 2025 jyly júzege asyrylatyn is-sharalar talqylandy.
Sondaı-aq agenttik tóraǵasy Sıngapýr ulttyq ýnıversıteti jáne Nanıang tehnologııalyq ýnıversıtetiniń basshylyǵymen memlekettik qyzmetshilerdiń quzirettiligi jáne kásibı daǵdylaryn arttyrýǵa qatysty ózara yntymaqtastyq kezdesýlerin ótkizdi. Nátıjesinde Qazaqstan Memlekettik qyzmet isteri agenttigi men Sıngapýr Ulttyq ýnıversıteti arasynda ózara túsinistik týraly memorandýmǵa qol qoıyldy. Memorandým aıasynda memlekettik basqarý men qyzmette ozyq tájirıbe almasý, basshylyq laýazymdaǵy memlekettik qyzmetshilerdiń biliktiligin arttyrý boıynsha qysqa merzimdi oqytý kýrstary men semınarlaryn uıymdastyrý, Lı Kýan Iý memlekettik saıasat mektebiniń oqý baǵdarlamalary boıynsha oqytý kózdelip otyr.
Sonymen qatar forým aıasynda MQIA tóraǵasy Darhan Jazyqbaı memlekettik qyzmetti damytý jáne ony sıfrlandyrý máseleleri boıynsha Ulybrıtanııa Memlekettik qyzmetiniń bas dırektory jáne Mınıstrler kabınetiniń turaqty hatshysy Ketrın Lıttlmen, Estonııanyń Úkimet keńsesiniń Memlekettik hatshysy Taımar Peterkoppen, Mońǵolııanyń Memlekettik qyzmet keńsesiniń tóraıymy Sedevsýren Lhagvamen yntymaqtastyq kezdesýlerin ótkizip, ózara tájirıbe almasý boıynsha kelisimge keldi.