Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Alǵashqy baıandamany Úkimet basshysy Oljas Bektenov, jasady, dep habarlaıdy Egemen.kz.
Oljas Bektenov sıfrlyq tehnologııalar men jasandy ıntellektti áleýmettik qoldanysqa keń aýqymda engizýdiń mańyzdylyǵyn jetkizdi.
«Jasandy ıntellekttiń «KazLLM» alǵashqy tildik modelin jasap shyǵardyq. Búginde ony úzdiksiz mashyqtandyrý jalǵasyp jatyr.
Sonymen qatar Prezıdent tapsyrmasyna sáıkes 2025-shi jyly Alem.AI halyqaralyq jasandy ıntellekt ortalyǵy ashylady.
«AI-Sana» baǵdarlamasy aıasynda bıyl 100 myń stýdent ekonomıka salalaryna jasandy ıntellektti engizýdiń qoldanbaly daǵdylaryna oqıtyn bolady.
20 joǵary oqý ornynyń bazasynda jasandy ıntellekt boıynsha mamandar daıarlaý qolǵa alyndy. «Bolashaq» baǵdarlamasy boıynsha jeke kvota engizildi.
Astana Hub tabysty startap-jobalardy daıyndaıtyn tıimdi alańǵa aınaldy. Búginde munda 1600 IT-kompanııa tirkelgen», dedi O. Bektenov.
Buǵan qosa Úkimet basshysy «Alaqan» atty baǵdarlamanyń qurylym júıesin mysalǵa keltirdi. Ol qoldanýshylardy alaqan izi boıynsha anyqtaýǵa múmkindik beredi. Aıtýynsha, atalǵan joba qazir 300 mektepte qoldanysqa engizilgen, jýyrda Úkimet ǵımaratynda ornatylatyn bolady. Sondaı-aq ony 6 elge: Saýd Arabııasy, Sıngapýr, Kýveıt jáne basqa da memleketterge eksportqa shyǵarý josparlanyp jatqanyn málimdedi.
«Taǵy bir startap – jasandy ıntellekt negizinde mátinnen vıdeo jasaýǵa jáne óńdeýge arnalǵan Higgsfield AI jobasy. Joba 100 mln. dollarǵa baǵalanyp otyr.
Balalardy baǵdarlamalaýǵa úıretetin Codiplay jobasy qazirdiń ózinde álemniń 13 elindegi mektepterde qoldanylýda.
Olardyń ishinde Ońtústik Koreıa, Túrkııa, Ulybrıtanııa, Katar jáne taǵy basqa elder bar. Atalǵan joba da 100 mln. dollarǵa baǵalandy.
Osy jáne Grand Mobile, CITIX, CEREBRA, OGames, Parqour, ApartX sııaqty basqa da tabysty qazaqstandyq jobalar bul baǵytta bizdiń zor áleýetimizdiń baryn kórsetedi», dedi O. Bektenov.