Osydan 15 jyl buryn qurylǵan «Syr medıa» mekemesi quramyna áýelgide aımaqtyń aǵa basylymdary sanalatyn «Syr boıy» jáne «Kyzylordınskıe vestı» gazetteri kirdi. Kóp uzamaı qalalyq, aýdandyq resmı basylymdar qosylyp, jumys aýqymy keńeıdi. Qazir «Syr medıa» elimiz boıynsha ónimin óz baspahanasynan shyǵaryp, ózi taratatyn irgeli uıymǵa aınalyp otyr.
Osydan 9 jyl buryn «Qazposhta» AQ-nyń gazetterdi tasymaldaý tarıfterin kóterý týraly habarlamasynan keıin gazetti shyǵarýdan bólek, jazdyrý, taratý qyzmetin de ózimiz uıymdastyrýdy da qolǵa alǵan edik. Mundaı qadamǵa barýymyzǵa baspasózge jazylýdan «Qazposhtaǵa» túsken qarjyny seriktestik qyzmetkerlerine jalaqy, kommýnaldyq jáne ózge de shyǵyndar tólemine suranys arqyly alyp otyrýymyz da túrtki boldy.
Áýelgide qajetti gazet taratýshylar sany jáne jumsalatyn qarjy kólemi esepteldi. Osylaısha, baspasóz jáne taratý bólimi quryldy. Qazir Qyzylorda qalasy men aýdan ortalyqtaryn aıtpaǵannyń ózinde oblystyń árbir aýylynda bizdiń mekemeniń gazet taratýshysy bar. Júzege asyrý úshin qosymsha baspasóz mamany, menedjer, suryptaýshy, mekenjaı jazýshy – barlyǵy 28 qyzmetkerden turatyn bólim ashyldy. Sonymen qatar 175 gazet taratýshy jumyspen qamtyldy. Gazetter oblys kólemindegi 164 eldi mekenge jetkiziledi.
«Syr medıa» seriktestiginiń baspasózge jazylý jáne taratý qyzmeti bir júıege túsip, basylymdarǵa jazylýshylar tarapynan senim qalyptasyp, elimizde júrgizilip jatqan memlekettik saıasatty jergilikti turǵyndarǵa nasıhattaý jumysy úzdiksiz jáne ýaqtyly júrgizilip keledi. 2022 jyldan bastap respýblıkalyq «Egemen Qazaqstan», «Kazahstanskaıa pravda», «Ana tili», «Aiqyn», «Lıter», «Turkistan», «Jas Alash», «Qazaq ádebıeti», «Ulan» gazetterine jáne «Juldyz», «Aq jelken», «Baldyrǵan» jýrnaldaryna jazdyrý jáne taratý qyzmetteri júzege asyrylyp keledi.
Aımaq jýrnalıstıkasyndaǵy basty máseleniń biri qarjy problemasy ekeni belgili. Bizde memlekettik tapsyrys, jazylym men jarnamadan túsetin qarjydan basqa tabys kózi joq. Sol sebepti gazet basý jáne taratý qyzmeti sýbsıdııalansa degen usynys bar. Mysaly, «Qazposhta» AQ-ǵa gazet taratý qyzmetimen aınalysqany úshin beriletin sýbsıdııany óńirlik merzimdi basylymdarǵa tikeleı baǵyttasa, gazetti shyǵarý men taratý shyǵyny kóp jeńilder edi.
Ýaqyt ótken saıyn gazet taralymy tómendep kele jatqany málim. Bul – barlyq óńirge ortaq másele. Mysaly, 2022 jyly seriktestik gazetteriniń jalpy taralymy 77 814 dana bolsa, 2023–2024 jyldary kórsetkish 71 779 bolyp, eki jylda ájepteýir azaıdy. Jeti-segiz jyl buryn 92 405 dana gazetke deıin taratqan kezimiz bolǵan.
Buǵan qosa jýrnalısterdi áleýmettik qoldaýdyń paketterin uıymdastyrýdy qolǵa alǵan jón. Kásibı mereke qarsańynda elorda tórinen baspanaly bolý baqyty buıyrǵan áriptester qýanyshy – bizge de ortaq. Aımaqtaǵy jýrnalısterge de dál osyndaı qoldaý kórsetilse, nur ústine nur bolar edi.
Memlekettik saıasatty, respýblıka men óńir jańalyqtaryn halyqqa jetkizý qaı kezde de ońaı bolmaǵan. Saladaǵy sanamalap ótken máselelerge qaramastan bılik pen halyq arasyndaǵy altyn kópir mindetin abyroımen atqara beremiz.
Marat ARALBAEV,
«Syr medıa» JShS bas dırektory