Sarqanda kólik júrgizý quqyǵynan aıyrylǵan azamat mas kúıde kólik júrgizip, qaıta qolǵa tústi, dep habarlaıdy Egemen.kz.
Jetisý oblystyq PD málimetinshe, Sarqan qalasynda polısııa qyzmetkerleri patrýldeý kezinde jol qozǵalysy erejelerin óreskel buzǵan HONDA markaly avtokóligin anyqtaǵan. Tekserý barysynda buryn jaýapkershilikke tartylǵan 46 jastaǵy er adam basqarǵany belgili boldy.
«Polısııa qyzmetkerleri júrgizýshiden qatty alkogol ıisin baıqaǵan. Qujattaryn tekserý barysynda er adamnyń 2022 jyldyń 1 mamyrynda Sarqan aýdandyq sotynyń sheshimimen mas kúıde kólik basqarǵany úshin segiz jyl merzimge júrgizýshi kýáliginen aıyrylǵany anyqtaldy.
Medısınalyq saraptama nátıjeleri boıynsha júrgizýshiniń orta dárejedegi alkogoldik masań kúıde bolǵany rastaldy.
Zańdy qaıta buzǵany úshin er adam qamaýǵa alyndy. Sonymen qatar, ol ómir boıyna kólik quralyn basqarý quqyǵynan aıyrylýy múmkin», delingen PD habarlamasynda.