Pavlodardaǵy «Gogol» túngi klýbynyń janynda abaısyzda bolǵan kisi ólimine qatysty sottyń úkimi jergilikti qoǵamnyń pikirin ekige jaryp tur. Aıypty dep tanylǵan 21 jastaǵy azamat óz ómirin qorǵaý úshin tóbelesýge májbúr bolǵan. Alaıda sot ony kináli dep tanyp, 4,5 jylǵa bas bostandyǵynan aıyrdy.
Abaısyzda kisi ólimine aparyp soqtyrǵan oqıǵanyń mán-jaıyna qysqasha toqtala ketsek. О́tken jyldyń tamyz aıynda «Gogol» túngi klýbynyń janynda eki jigit tóbelesip, qatty soqqydan biriniń mıyna qan quıylyp jan tapsyrǵan. «Oqıǵa tań aldynda bolǵan. Jas jigitti áldebireýlerdiń uryp-soqqany týraly shaqyrtý shamamen saǵat 04.48-te tústi. Medısınalyq brıgada jedel jetkenimen soqqy tıgen azamattyń kóz jumǵany anyqtaldy», dep habarlaǵan edi jedel járdem qyzmetinen.
Keıin tártip saqshylary oqıǵany jiti tekserip, densaýlyqqa qasaqana aýyr zııan keltirý deregi boıynsha tergeý júrgizdi. Kúdikti Jolaman Qusaıynov ustalyp, qamaýǵa alyndy. Alǵashqyda qaıtys bolǵan Sergeı Sýhonosenkonyń týystary tóbelesti alǵash bastaǵan J.Qusaıynov dep kinálaǵan edi. Keıin kóshe kameralaryndaǵy jazbadan qarap, oqıǵanyń shyn máninde basqasha órbigenine kýá boldyq. Beınejazbada marqum jigittiń teńsele basyp klýbtan shyqqany, odan soń óz betinshe sóılesip turǵan úsh zamandasyna jaqyndaǵany baıqalady. Olardan áldeneni suraǵandaı (sotta shylym suraǵany aıtyldy) bolady. Keıin artqa sheginip, qaltasynan pyshaq alyp shyǵady da oń qolyna ustaıdy. Álgilerge jaqyndap kelip, sol qolymen Jolamannyń betinen urýǵa árekettenedi. Osy arada ekeýiniń arasynda tóbeles bastalyp, J.Qusaıynov ishimdikke toıyp alǵan jigittiń soqqylarynan jaltaryp, kúres ádisine salyp jyǵyp alǵanyn kórýge bolady. Birer sátten soń jibere salǵanymen Sergeı qaıtadan kelip shúılikken. Qorǵanyp júrgen azamat bir-eki soqqy jasaýǵa májbúr bolǵan. Judyryǵymen aýa qarmap júrgen Sergeıdiń kenetten artqa sheginip, eki qolyn jaıa jerge gúrs etip qulaǵany da kameraǵa túsip qalǵan. Alaıda qorǵanyp júrgen jigit bul sátte oǵan eshbir soqqy jasamaǵan.
Keıin anyqtalǵandaı, 23 jastaǵy S.Sýhonosenko bul túni kóńil jarastyryp júrgen qyzymen ýaqyt ótkizip, sońynan janjaldasyp, «Gogol» klýbyna ketip qalǵan. Oqıǵa ornynda bolǵandardyń eshqaısysy janjaldy sheshýge oqtalmaǵany da tańǵaldyrady. Klýbtyń qaýipsizdik qyzmeti de kirispegen. Medısınalyq saraptama Sergeıdiń mıyna qan quıylǵannan qaıtys bolǵanyn anyqtady. Sarapshylar jigittiń basynan 7-8 soqqy alǵany týraly qorytyndy shyǵarǵan.
Sot otyrysynda Jolamannyń ishimdik ishpegeni, ózin qorǵaǵany nazarǵa alyndy. Janynda bolǵan kýágerler marqum azamat alǵash bolyp pyshaqpen shabýyldaǵanyn mysal etti. Aqyr-sońy Pavlodar qalalyq №2 sotynyń úkimimen Jolaman Qusaıynov abaısyzda adam ólimine ákelip soqqan qylmysy úshin kináli dep tanylyp, 4,5 jarym jylǵa bas bostandyǵynan aıryldy.
Alaıda eki tarap ta bul sheshimmen kelispeı otyr. Sergeıdiń anasy ol kem degende 8 jyl túrmede otyrý kerek dep esepteıdi. Al aıyptalýshynyń týystary sotta negizge alynǵan baptardy qaıta qarap, ony ruqsat etilgen ózin-ózi qorǵaý sheginen asyp ketý babyna aýystyrýdy talap etedi. Eki otbasy jyl basynda sotta qaıta kezdesken edi. Úkim ázirshe sol kúıinde qaldyryldy.
Qazir bul oqıǵaǵa qatysty jergilikti qoǵamnyń pikiri de qaq jarylyp tur. Biri «jas jigit adam qolynan qaza tapty, sol úshin tıisti jazasyn alýy kerek» dese, ekinshileri «Jolamannyń eshbir jazyǵy joq, ózin qorǵaǵany úshin qanshama jyl ǵumyryn túrmede ótkizýi ádiletti emes» degen pikirde. Bul isti sot aldaǵy ýaqytta qaıta qarap, ádiletti úkim shyǵarady degen senimdemiz.
Pavlodar oblysy