Eńbek naryǵyn suranysqa ıe mamandarmen qamtamasyz etý maqsatynda memleket 9-synyp túlekterine tegin bilim alý múmkindigin jasap jatyr, dep habarlaıdy Egemen.kz.
Búginde tehnıkalyq jáne kásiptik bilim berý júıesinde 772 kolledj jumys isteıdi, onda 565 myń stýdent bilim alyp jatyr.
Bıyl suranysqa ıe tehnıkalyq jáne kásiptik bilim berý boıynsha tegin oqýmen qamtylatyn stýdentter sany 153 myńdy quraıdy, (byltyrǵydan 10 myń orynǵa artyq) Memlekettik tapsyrystyń 70%-y tehnıkalyq mamandyqtarǵa, onyń ishinde mashına jasaý, kólik, energetıka, IT, qurylys jáne basqa da salalarǵa baǵyttalatyn bolady.
«Negizgi basymdyq – básekege qabiletti mamandar daıarlaý, bilim berý mekemelerin zamanaýı materıaldyq-tehnıkalyq bazamen tolyq qamtamasyz etý, pedagogterdiń biliktiligin arttyrý. Qazirgi tańda kásiptik-tehnıkalyq bilim berý júıesin transformasııalaý boıynsha keshendi jumys júrgizilip jatyr, bul memlekettik tapsyrystyń kólemin ulǵaıtýdy, bilim berý baǵdarlamalaryna úzdik halyqaralyq tájirıbelerdi engizýdi, kásibı sheberlik chempıonattaryn ótkizýdi qamtıdy. Sondaı-aq, kásiporyndar úshin dýaldi oqytý júıesin damytý jáne mamandardy daıarlaý maqsatynda bıznes qurylymdary men ınvestorlardy tartý josparlanyp jatyr», dep atap ótti Tehnıkalyq jáne kásiptik bilim departamentiniń dırektory Áset Muhanbetov.
Oqý-aǵartý mınıstrliginiń baspasóz qyzmetiniń málim etýinshe qazirgi ýaqytta kolledjderge 518 kásiporyn sheftik qamqorlyq kórsetedi, olardyń sanyn 4 myńǵa jetkizý josparlanyp otyr. Sonymen qatar jumys berýshilermen birlesip, kásiptik standarttar men memlekettik jalpyǵa mindetti bilim berý standarttary jáne WorldSkills standarttarynyń talaptaryn eskere otyryp, 8 myńǵa jýyq bilim berý baǵdarlamasy ázirlendi. Bıyl kolledjder men jumys berýshiler 2 myńnan astam bilim berý baǵdarlamasyn ázirleıdi jáne óndiristik bazada 2 myń pedagog taǵylymdamadan ótedi.