Aqshany qate aýdarý – kez-kelgen adammen bolýy yqtımal jaǵymsyz jaǵdaı. Keıde bul shottyń nómirin nemese telefon nómirin qate terý, al keıde aqshany basqa adamǵa aýdaryp jiberetin kezder bolady. Qalaı bolǵanda da, aqshany qaıtarý, ásirese, aqshany alǵan adam baılanysqa shyqqysy kelmegen jaǵdaıda qıynǵa soǵýy múmkin. Fingramota.kz mundaı jaǵdaılarda ne isteý kerek, aqshany qaıtarýdyń qandaı joldaryn usyndy, dep habarlaıdy Egemen.kz.
Bul rette, qate jasalǵan aýdarymdardyń barlyǵyn sol sátte boldyrmaý múmkin emestigin túsiný qajet. Eger aqshańyz alýshynyń shotyna aýdarylyp ketse, ony qaıtarý prosesi qıynǵa soǵady.
Eger siz aqshany qatelesip aýdaryp jiberseńiz ne isteý kerek?
Dereý bankpen baılanysyńyz. Eger siz aýdarym jasaǵannan keıin qateleskenińizdi birden bilseńiz, dereý óz bankińizben baılanysyńyz. Keıbir jaǵdaılarda, ásirese, eger aýdarym áli óńdelip úlgermese, bank tranzaksııany boldyrmaýy múmkin. Mobıldi qosymshadaǵy chatty paıdalanyńyz nemese qoldaý qyzmetine jedel túrde qońyraý shalyńyz. Eger aqsha sizdiń shotyńyzdan alynyp, basqa shotqa aýdarylsa, onda basqa sheshim talap etiledi.
Alýshymen baılanysýǵa tyrysyńyz. Eger siz aqshany kezdeısoq basqa adamǵa jibergen bolsańyz, onyń baılanys derekterin tabýǵa tyrysyńyz (mysaly, mobıldi bank nemese tólem tarıhy arqyly) jáne tikeleı habarlasyńyz. Jaǵdaıdy sypaıy túrde túsindirip, qarajatty qaıtarýdy surańyz.
Alýshynyń bankine habarlasyńyz. Eger tikeleı baılanys múmkin bolmasa, aqsha jiberilgen bankke habarlasyńyz. Qate aýdarymdy qaıtarý týraly ótinish jazyńyz. Bul jaǵdaıda bank alýshyny suraý salý týraly habardar ete alady jáne aqshany óz erkimen qaıtarýdy usyna alady. Bul rette aýdarym kúni men ýaqyty, somasy, aqsha jiberilgen shot nemese karta nómiri jáne qateniń sıpattamasy qajet bolady.
Eger alýshy aqshany qaıtarýdan bas tartsa, onda aqshany óndirip alý týraly talap-aryz berýge bolady, sebebi qoldanystaǵy zańnamada, QR Azamattyq kodeksine sáıkes bul áreket «negizsiz baıytý» retinde qarastyrylady. Sondaı-aq, siz QR Ulttyq Bankiniń qoldanystaǵy qaıta qarjylandyrý mólsherlemesi boıynsha aqshańyzdy paıdalanǵany úshin syıaqy óndirip ala alasyz. Ol úshin alýshy sotqa deıingi ótinishti jiberýi, aqsha aýdarymyn rastaýy (bankten úzindi kóshirme) jáne sotqa aryz berýi qajet. Sot kóp jaǵdaıda aqshany qaıtarýǵa mindetteıdi, biraq bul prosess birneshe aıǵa sozylýy múmkin.
Keıde jaǵdaı kerisinshe sizge kútpegen jerden aqsha kelip túsýi múmkin. Bul rette qarajattyń sizdiki emes ekenin jáne olardy paıdalaný zańdy saldarǵa ákelýi múmkin ekenin túsiný mańyzdy.
Mundaı jaǵdaıda bankke habarlasyp, belgisiz qarajattyń aýdarylǵany týraly málimdeý kerek. Sondaı-aq, bul aqshany jumsamaýǵa tyrysyńyz, banktiń resmı ótinishin kútip, eger jiberýshi qaıtarý týraly ótinish bildirse, qarajat sizdiń qatysýyńyzsyz esepten shyǵarylýy múmkin.
Sonymen qatar keıde alaıaqtar kóbinese aqshany ádeıi az mólsherde jiberip, sodan keıin olardy basqa shotqa qaıtarýdy talap etedi. Bul aqshany jylystatý, sizdi «qarjylyq shemaǵa qatysýshy» mártebesine aýystyrý nemese jeke derekterińizdi suraý áreketi bolýy múmkin.
Esterińizge sala keteıik, «Qate aýdarymdary» bar shemalardy kóp jaǵdaıda dropperler paıdalanady. Eger siz olarǵa kómektesip, aqshany olar kórsetken shotqa aýdarsańyz, olar sizge «mazalaǵany úshin» dep, qarajattyń bir bóligin qaldyrýdy usynýy múmkin. Alaıda, keıinnen zardap shekken adam sizden barlyq somany azamattyq tártippen óndirip alýy múmkin.