Qajy saparynan kele jatqan pavlodarlyq azamat jetisýlyq dárigerdiń arqasynda aman qaldy. Aq jeleńdi abzal jan áýe kemesindegi jolaýshynyń ómiri úshin tórt saǵatqa jýyq kúresip, Almatyǵa esen-saý jetkizgen.
Pavlodar qalasynyń turǵyny Murat Imanǵazınovtiń Saýd Arabııasyndaǵy Jıdda qalasynan Almatyǵa ushqan áýe kemesinde kele jatyp, aıaq astynan densaýlyǵy kúrt nasharlaıdy. Tumaýǵa qarsy dáriniń birnesheýin iship, uıyqtap ketken otaǵasy arada bir saǵat ótkende bet-aýzy adam tanymastaı isip oıanady.
– Allergııalyq aýrý paıda bolǵanyn birden sezindim. Betim, moıyn tusym isinip ketken. Jerden 10 myń metr bıiktikte kele jatqan soń ba, tynysym tarylyp, qan qysymym kóterilip, ahýalym nasharlap bara jatty. Bortserik qyrǵyz qyzy jaǵdaıymdy ushaq ishindegi jolaýshylarǵa habarlap, shuǵyl túrde dáriger qajet ekenin aıtty. Abyroı bolǵanda bizben birge Jetisý oblysynyń dárigeri Jannur Syrymov degen azamat ushyp kele jatyr eken. Birden janyma kelip, dárihana qobdıshasyn alyp shyqty da, maǵan ekpe jasap, em qoldana bastady. Bul ýaqytta shamamen Qap taýlarynyń ústinde ushyp kele jatqanbyz. Ekıpaj shuǵyl jaǵdaı bolsa, ushaqty jaqyn mańdaǵy áýejaıdyń birine qondyramyz degen sheshim qabyldaǵan eken. Biraq Jannur Máýlenuly óz isiniń kásibı mamany ekenin tanytyp, Almatyǵa aman túsirdi. Abzal janǵa sheksiz rızashylyǵymdy jetkizgim keledi, – deıdi M.Imanǵazınov.
J.Syrymov búginde Jetisý oblysy, Kóksý aýdandyq aýrýhanasynyń bas dárigeri bolyp qyzmet atqarady. Onyń da Mekkege ákesin qajylyqqa aparyp, qaıtyp kele jatqan beti eken. «Naýqasqa ómirimde áýede medsınalyq kómek kórsetem degen oı bolmapty. Ákeme únemi em-dom jasap júretindikten, janymda dári-dármek qobdıshasyn ustaıtynmyn. Bortserik qyzdyń habarlaýynan soń naýqas aǵanyń janyna jedel baryp qarasam, kóziniń aınalasy men beti isine bastaǵan. Anafılaktıkalyq shok baıqaldy. Muny medısına tilinde «Kvınke isinýi» dep ataıdy. Eger 15–20 mınýt ishinde adamǵa medısınalyq kómek kórsetilmese, ólip ketýi yqtımal. Birden «Allergopress» jáne «Prednızolon» preparattaryn ektim. Qan qysymyn ólshep, tiliniń astyna tabletka saldym. Sıstema salýdy da bastap kettim», dedi telefon arqyly tildeskenimizde J.Syrymov.
Abzal jannyń Gıppokrattyń antyn qabyldap, medısına salasyna aralasqanyna 15 jyldyń júzi bolǵan. Ýrolog-transplantolog mamandyǵyn meńgergen. Kóksý aýdanyndaǵy qyzmetine deıin Almatydaǵy Syzǵanov atyndaǵy ulttyq ǵylymı hırýrgııa ortalyǵynda búırek transplantologııasy, ýrologııa jáne ekstrakorporaldy detoksıkasııa bólimshesiniń meńgerýshisi, Taldyqorǵan qalasynda aýrýhana basshysynyń orynbasary bolyp eńbek etken. Medısına salasyndaǵy alǵashqy qyzmetin sanıtarlyq feldsher bolyp bastaǵan. «Mundaı shuǵyl sátterde ne isteý kerek ekenin bilemin», deıdi ol. Ári bortserik qyz da kómektesip janynda júrgenin jetkizdi.
Jannur Máýlenulynyń jubaıy da medısına salasynda, sáýlelik dıagnostıka dárigeri bolyp jumys isteıdi. Erli-zaıyptylar shańyraǵynda bes balany ósirip-órbitip, kópbalaly ári úlgili otbasy atanyp otyr. Syrymovtar otbasy 2023 jyly Jetisý oblystyq «Kóshbasshy» baıqaýynda «Úzdik jas otbasy» nomınasııasyn ıelengen.
Flynas áýe kompanııasynyń bortserigi Ulkelsin Osýbalıeva mundaı oqys jaǵdaıdy alǵash ret kezdestirip otyrǵanyn áńgimeledi.
– О́zim Qyrǵyz eliniń azamatymyn. Biraz jyldan beri Saýd Arabııasynyń áýe kompanııasynda eńbek etip júrmin. Almatyǵa aıyna kem degende bir márte kelip ketemiz. Jolaýshy M.Imanǵazınovtiń jaǵdaıy nasharlaǵan alǵashqy sátte kapıtanymyz ushaqty keri buryp, Jıdda qalasynyń áýejaıyna qonýǵa sheshim qabyldaǵan. Biraq keıin bilgenimizdeı, keri oralyp, jerge qonǵansha onyń ómirin aman saqtap qalýǵa ýaqyt jetpeıdi eken. Dáriger J.Syrymovtyń bul reıske otyrǵany da kezdeısoqtyq emes, bir qudiretti kúshtiń yqpaly dep oılaımyn. Sóıtip, adamdy ólim aýzynan alyp qalǵan dárigerdiń erligine tuńǵysh ret kýá boldym, – dedi bortserik qyz aǵynan jarylyp.
Almaty áýejaıy Flynas áýe kompanııasynyń ushaǵyn áýejaıǵa qondyryp, M.Imanǵazınovti jedel járdemmen kútip alǵan. Otaǵasynyń jaǵdaıy búginde qalypty, Pavlodardaǵy otbasyna oraldy.
Pavlodar oblysy