Qazaqstannyń joǵary sot organynda Joǵarǵy Sottyń azamattyq ister jónindegi sot alqasynyń tóraǵasy Sanan Gadjıev bastaǵan Ázerbaıjan sýdıalarynyń delegasııasy boldy, dep habarlaıdy Egemen.kz Joǵarǵy Sottyń baspasóz qyzmetine silteme jasap.
Ázerbaıjan sýdıalarynyń Astanaǵa bul jumys sapary – sońǵy úsh jyldaǵy úshinshi sapary. Sonyń aıasynda delegasııa Qazaqstan sottarynda júrgizilip jatqan reformalardy egjeı-tegjeıli zerdeleýdi josparlady.
Ázerbaıjandyq delegasııanyń kelýine oraı izgi tilegin jetkize otyryp, QR Joǵarǵy Sotynyń Tóraǵasy Aslambek Merǵalıev sot tóreligine qoljetimdilikti keńeıtýge jáne buzylǵan quqyqtardy qorǵaýǵa baǵyttalǵan sot reformasynyń negizgi bastamalaryna toqtaldy.
Olardyń qatarynda – ákimshilik ádiletti damytý (azamattar men kásipkerler memlekettik organdarǵa qarsy isterdiń 58 paıyzyn jeńedi), apellıasııanyń rólin kúsheıtý, otbasylyq sottardy qurý, eksaýmaqtyq sottylyqty engizý, sondaı-aq kassasııalyq qadaǵalaýdy jetildirý máseleleri bar.
Sonymen qatar, sottardy qarjylandyrýdyń jańa modelin engizý arqyly sýdıalardyń táýelsizdigin nyǵaıtý, sýdıalardy kásibı baǵalaý ádistemesin jetildirý jáne sot isin júrgizýdi sıfrlandyrý atap ótildi.
Atalǵan reformalar týraly tolyǵyraq QR Joǵarǵy Sotynyń azamattyq ister jónindegi sot alqasynyń tóraǵasy Nurserik Sháripov pen QR Joǵarǵy Sotynyń sýdıasy Arystanbek Stybaev aıtyp ótti.
Odan keıin delegasııa respýblıka sottarynyń qyzmetin taldaýmen jáne monıtorıng júrgizýmen aınalysatyn Joǵarǵy Sottyń ahýaldyq ortalyǵynyń múmkindikterimen tanys boldy.
Qonaqtardy jasandy ıntellekt elementteri bar IT-qyzmetteri, sondaı-aq robottyq prosester erekshe qyzyqtyrdy.
Sapar barysynda qonaqtar Joǵarǵy Sotqa jyly jyly shyraıly qabyldaý úshin alǵys aıtyp, yntymaqtastyqty damytýǵa eki jaqty nıetti ekenin atap ótti.
Sapar barysynda ázerbaıjandyq delegasııa elordalyq sottardyń, AHQO Tórelik ortalyǵynyń jáne Joǵary Sot Keńesiniń jumysymen de tanysýdy josparlady.