Seısenbi kúni Brazılııanyń bas prokýrory burynǵy prezıdent Jaır Bolsonarýdy memlekettik tóńkeris jasaýǵa árekettendi dep resmı túrde aıyptady, dep habarlaıdy Egemen.kz NBC News arnasyna silteme jasap.
Habarlanǵandaı, josparda qazirgi prezıdent Lýıs Inasıý Lýla da Sılvany ýlaý jáne Joǵarǵy sot sýdıasy Aleksandr de Moraesty óltirý bolǵan.
«Qylmystyq uıym músheleri bılik júıesin jáne demokratııalyq tártipti joıýǵa baǵyttalǵan shabýyl jasaý josparyn prezıdenttik saraıda ázirlegen. Bul jospar «Jasyl jáne sary qanjar» degen zulym ataýǵa ıe boldy» dep jazdy Bas prokýror Paýlý Gonet Bolsonarý men taǵy 33 adamǵa qatysty 272 bettik aıyptaý qorytyndysynda.
Aıta keteıik, Bolsonarý kóbinese Brazılııanyń ulttyq jasyl-sary fýtbol jeıdesin kıip júredi, sondyqtan bul túster onyń saıası qozǵalysymen baılanystyryla bastaǵan.
Joǵarǵy sot aıyptaýlardy qarap, eger olar qabyldansa, Bolsonarý sot aldynda jaýap beredi.
Bas prokýratýranyń baspasóz qyzmetiniń málimdemesine sáıkes, memlekettik tóńkeristen basqa, 34 kúdikti qarýly qylmystyq uıymǵa qatysý, demokratııalyq quqyq tártibin kúshpen qulatýǵa áreket jasaý, memlekettik aktıvterge zorlyq-zombylyq pen aýyr qaýip retinde baǵalanǵan zalal keltirý, sondaı-aq mádenı mura nysandarynyń jaǵdaıyn nasharlatý boıynsha aıyptalǵan.
Buǵan deıin Bolsonarý 2026 jylǵy saılaýǵa qatysý quqyǵynan aıyrylǵan bolatyn. Joǵarǵy saılaý sotynyń sýdıalary onyń bılikti asyra paıdalanǵanyn jáne eldegi elektrondy daýys berý júıesiniń tıimdiligine negizsiz kúmán keltirgenin anyqtaǵan edi.