Jeńistiń 80 jyldyǵyna oraı Jezkent kentinde shaıbaly hokkeıden jasóspirimder arasynda týrnır ótti. Atalǵan sharada 2008-2014 jyldar aralyǵynda týǵan jasóspirimder baqtary men baptaryn qatar synady.
Týrnırdi uıymdastyryp otyrǵan sport mamandarynyń sózinshe jergilikti jerde ótetin osyndaı jarystardyń mańyzy zor. Sebebi, turǵylyqty jerine qaramastan talabyn ushtaǵan jastardyń sportqa degen oń kózqarasy qalyptasyp, bolashaqta úlken sportqa joldama alatyny sózsiz. Buǵan dálel osyǵan deıin ótkizilgen jergilikti týrnırlerdiń nátıjesinde kenshiler kentinen shyqqan jastar búgingi kúni bási joǵary dodalarda bıik belesterdi baǵyndyryp júr.
«Aldymen, dástúrli týrnırdiń ótkizilýine qoldaý kórsetken barsha azamattarǵa zor alǵys bildiremiz. Jarysty ótkizýde basty maqsat retinde qysqy sport túrin damytý jáne jasóspirimderdiń qysqy ýaqyttaǵy demalys ýaqytyn arttyrýdy kózdep otyrmyz. Týrnırge qatysqan «Shahter» komandasy Jezkent qalasynda ǵana emes oblystyq deńgeıde óner kórsetip júrgen shaıbaly hokkeı komandasy. Búgingi kúni osy komandada óner kórsetetin jetkinshekterdiń aldaǵy ýaqytta úlken sportshy bolatyny anyq» deıdi týrnırdi uıymdastyrýshy jattyqtyrýshylardyń biri Aıdos Tórtbaı.
Jasóspirimder arasyndaǵy shaıbaly hokkeı týrnıriniń nátıjesinde «Shahter» komandasy I oryndy ıelense, «Batyr» komandasy II oryn jáne «Shahter - 2» komandasy III oryn aldy. Jarysqa qatysýshylar atalǵan týrnırdiń bas demeýshisi «Shyǵystústimet» kompanııasy taǵaıyndaǵan asa baǵaly syılyqtarǵa ıe bolyp, alǵys hattarmen marapattaldy.
Abaı oblysy