Búgin Bas prokýratýrada qylmystyq-atqarý júıesindegi zańdylyq pen quqyqtyq tártiptiń ózekti máseleleri talqylanǵan Úılestirý keńesiniń kezekti otyrysy ótti, dep habarlaıdy Egemen.kz.
Is-sharany asha otyryp, Bas Prokýror Berik Asylov sottalǵandardyń quqyqtaryn, bostandyqtaryn jáne zańdy múddelerin qurmetteý men qorǵaý – bul Zańnyń tikeleı talaby ekenin jáne olardyń ońalýy men qoǵamda quqyqtyq tártipti saqtaýdyń mańyzdy aspektisi ekenin atap ótti.
Otyrysqa Parlament depýtattary, oblys ákimderi, ortalyq memlekettik organdardyń, Qylmystyq-atqarý júıesi komıtetiniń, Ulttyq ulannyń birinshi basshylary, Adam quqyqtary jónindegi ulttyq ortalyqtyń ókilderi, sondaı-aq óńirlerde beınekonferensııa baılanysy arqyly aýmaqtyq úılestirý keńesteriniń músheleri qatysty.
Sońǵy jyldary qylmystyq-atqarý júıesinde reformalar júrgizilip, qoǵamdyq baqylaý keńeıtilgeni atap ótildi. Kolonııalarda tolyq beınebaqylaý engizilip (40 myń beınekamera ornatylǵan), sottalǵandardyń tikeleı ótinish berýi úshin 600 elektrondyq termınal qoıylǵan.
2023 jyldan bastap sottalǵandardy túzeý mekemelerine bólý tujyrymdamasy ózgertildi. Endi alǵash ret sottalǵandar QAJ-niń ortasha qaýipsizdik mekemelerinde ustalsa, buryn bas bostandyǵynan aıyrý jazasyn ótegender – eń joǵary qaýipsizdik mekemelerinde ornalastyrylady.
Qabyldanǵan keshendi sharalar azaptaý týraly sıgnaldar sanyn 5 ese azaıtýǵa múmkindik berdi.
Densaýlyq saqtaý mınıstrligi men jergilikti atqarýshy organdarmen birlesken jumystardyń nátıjesinde jańa ǵımarattar men jabdyqtar bólinip, táýlik boıǵy kezekshilik pen telemedısına engizildi, sondaı-aq barlyq sottalǵandar skrınıngten ótti.
Sottalǵandardyń quqyqtaryn saqtaý, bilim alýǵa qoljetimdilik, jumysqa ornalastyrýdy uıymdastyrý, sybaılas jemqorlyqqa qarsy kúres jáne qylmystyq jazany oryndaý júıesinde zańdylyqty qamtamasyz etý máselelerine erekshe nazar aýdaryldy.
Sondaı-aq qylmystyq-atqarý júıesiniń aldynda turǵan ózekti problemalar men qaýip-qaterler týraly baıandamalar tyńdaldy. Olardyń ishinde uıymdasqan qylmystyq toptardyń qyzmetine qarsy turý, tyıym salynǵan zattardy tasymaldaýǵa jáne zańsyz aqsha aınalymyna jol bermeý máseleleri qaraldy.
Úılestirý keńesiniń qorytyndysy boıynsha qylmystyq-atqarý júıesiniń tıimdiligin arttyrýǵa baǵyttalǵan zańnamalyq túzetýlerdi qosa alǵanda, bar problemalardy sheshý joldary aıqyndaldy.