Qaladaǵy «Dostyq» úıinde «Qaısar» komandasynyń jańa quramyn tanystyrý rásimi ótti. Is-sharada oblys ákiminiń orynbasary Shahmardan Baımanov fýtbolshylarǵa jańa maýsymda sáttilik tiledi.
Bıyl komanda elimizde alǵashqylardyń biri bolyp legıonersiz oınaıdy. Qazir komanda quramyndaǵy 25 fýtbolshynyń altaýy jańadan qosylǵan oıynshylar. Olardyń arasynda Qazaqstan quramasynyń oıynshysy Aıbol Ábiken, el chemıonatynyń 8 dúrkin jeńimpazy, tájirıbeli qaqpashy Aleksandr Mokın, Qazaqstan jastar quramasynyń fýtbolshylary Roman Bojko, Nıkıta Gýbarev, Nurdáýlet Aǵzambaev, Jalǵas Jaqsylyqov bar.
Oblys ákiminiń orynbasary óńirdegi sport salasyn damytý baǵytyndaǵy jumystardy atap ótti. Aımaqta zamanaýı úlgidegi sport keshenderi salynyp, el ıgiligine tabystalyp keledi. Qyzylorda qalasynyń sol jaǵalaýynda 11 myń oryndyq jańa stadıonnyń qurylysy júrip jatyr. О́tken jyly Qazaqstan fýtbol federasııasynyń «ALAN» baǵdarlamasy aıasynda Ǵ.Muratbaev atyndaǵy stadıonnyń qosalqy alańy qaıta jańǵyrtylyp, paıdalanýǵa berildi.
Kezekti el birinshiligine komanda tyńǵylyqty daıyndalyp, Túrkııada eki oqý-jattyǵý jıynyn ótkizdi. «Qaısar» Qazaqstan chempıonatynyń 1 týryn 2 naýryzda «Jeńispen» kezdesýden bastaıdy.