Qazaqstan halqy Assambleıasyna bıyl 30 jyl tolady. Osy ýaqyt aralyǵynda uıym elimizde etnosaralyq tatýlyqty saqtaýda irgeli isterge uıytqy bolyp júr. Birlikten asqan baılyq joq. Bul – Assambleıanyń urany. Osy birliktiń arqasynda elimiz gúldenip, damyp keledi.
Táýelsizdik alǵan tusta álem jurty elimizge kúdik-kúmánmen qaraǵany ras. Qanshama ult ókili ómir súretin respýblıka tatýlyq pen tynyshtyq synaǵynan qalaı óte alar eken dep demin ishine tartqany bar. Biraq elimiz osy syndarly kezeńnen aman-esen ótti. Bul qazaq halqynyń tabıǵatynan tolerantty minezine qatysty bolsa, ekinshiden Assambleıanyń nátıjeli jumysynyń jemisi. Osy kúnde uıym tek merekelik is-sharalar uıymdastyrýmen shektelmeı, eldiń áleýmettik-ekonomıkalyq damýyna ózderiniń joba-bastamalary arqyly úles qosyp otyr.
Shymkent qalalyq Qazaqstan halqy Assambleıasynda 16 etnomádenı birlestik bar. Olardyń barlyǵy da bir úıdiń balasyndaı bir-birimen jaqyn aralasyp, kóptegen máseleni birige otyryp sheshedi. Elde qýanyshty nemese qaıǵyly jaǵdaı bola ma, dereý soǵan ún qatyp, azamattyq tanytady. Sonyń biri – byltyrǵy kóktemdegi sý tasqyny. Soltústik pen batys óńirdegi jurtqa ońaı tımedi. Qanshama úı sýǵa ketti. Mal shyǵyny boldy. Memleket qoldan kelgendi jasap, turǵyndardy qaýipsiz jerge kóshirip, ýaqytsha baspanaǵa ornalastyrdy. Tasqyndy eńserýge halyq bolyp jumyla kiristik. Árkim shamasyna qaraı kómek qolyn sozdy. Eldiń qaıǵysyn birinshi bolyp bólisýge umtylǵan qaıyrymdy jandar qatarynan Shymkent qalasy assambleıasynyń músheleri da tabyldy. Naqty sanǵa kóshsek, etnomádenı birlestik ókilderi jylý jınap, 120 tonnadan asa materıaldyq kómekti zardap shekken óńirlerge jiberdi. Bes-alty júk kóligin quraǵan járdem qorjynynda kıim-keshek, azyq-túlik, gıgıenalyq, medısınalyq preparattar, kórpe-tósek, basqa da turmysqa qajetti zattar boldy. Qalalyq Assambleıa «Júrekten – júrekke» aksııasy aıasynda osynaý qaıyrymdylyq is-sharasyn uıymdastyrdy. Tasqyn sý basylyp, jaǵdaı turaqtalǵan soń kómek qolyn sozýǵa atsalysqan bir top azamat pen uıymdar marapattalyp, el atynan úlken alǵys arqalady. Olardyń qatarynda «IýgProdýktGrýpp» JShS, «Atameken» kásipkerler palatasy, «Assambleıa jastary» uıymy, etnomádenı birlestik tóraǵalary men ózge de belsendi kisiler boldy.
Qalalyq Assambleıa – kóptegen ıgi istiń bastamashysy. Uıym janynda Aqsaqaldar keńesi, Analar keńesi, Medıasııa keńesi sekildi qurylymdar jumys isteıdi. Aqsaqaldar keńesiniń atqaratyn qyzmeti – ultaralyq tatýlyqty dáripteý, qoǵamda bolyp turatyn túrli keleńsiz jaǵdaıdyń aldyn alý, ásirese ózge ult ókilderi arasyndaǵy turmystyq janjaldyń aldyn alý, memlekettik baǵdarlamalardy, úkimettik jobalardy halyqqa keńinen tanystyrý, nasıhattaý. Sol sekildi Analar keńesi otbasy ınstıtýtyn nyǵaıtý, jastar arasynda quqyq buzýshylyqtyń aldyn alý, rýhanı-patrıottyq tárbıe berý, áıelder kásipkerligin damytý baǵytynda jumys atqarady. О́skeleń urpaqty patrıottyqqa baýlýda, otanshyldyq sezimin qalyptastyrýda «Assambleıa jastarynyń» alar orny erek.
Statıstıkaǵa júginsek, byltyr qalalyq Assambleıa tarapynan 150-den asa is-shara ótkizilgen. Olardyń kópshiligi áleýmettik, mádenı, etnosaralyq birlikti nyǵaıtý, jalpyulttyq biregeılikti saqtaý maqsattaryna baǵyttalǵan. Memlekettik tildi dáripteý, qoldanys aıasyn keńeıtý bastamasy aıasynda da Assambleıanyń arqalaǵan júgi aýyr. Sonyń bir aıǵaǵy uıymǵa múshe etnobirlestik ortalyǵynyń jastary is-shara, jıyndarda tek memlekettik tilde sóılep, qazaqsha baıandama jasaýǵa tyrysady.
Búginde árbir etnos ókiliniń ulttyq merekesi ataýsyz qalmaıdy. Ony toılaýǵa barsha etnomádenı birlestik atsalysady. Rojdestvo, Sabantoı, Sollal, Ofarın bolsyn, bul merekeler – megapolıs turǵyndarynyń basyn qosatyn ortaq qýanysh. Osynyń bári elimizde ultaralyq dostyq pen yntymaqtyń shynaıy beınesin kórsetedi.
Shaharda Qazaqstan halqy Assambleıasynyń 30 jyldyǵyn atap ótýge baılanysty qala ákiminiń qaýlysymen is-sharalar jospary bekitildi. Oǵan sáıkes 1 naýryz Alǵys aıtý kúninen bastap jyldyń sońyna deıin mádenı-kópshilik is-sharalar ótkizý josparda bar. Igi isterdiń ishinde joǵary oqý oryndarynda stýdentterdiń qatysýymen ótetin dóńgelek ústel, Dostyq úıindegi tarıhshy, zertteýshi, qoǵam qaıratkerleriniń eńbekteri baıandalatyn semınarlardy, túrli ult ókilderiniń qolóneri men óndirgen taýarlarynyń kórmesin, arnaıy «Alǵys» kerýenin atap ótsek bolady. Sondaı-aq bıylǵy saltanatty mereıtoı aıasynda «Qazaqstan halqy Assambleıasyna – 30 jyl» eskertkish taqtasy ashylady. Otyz jyldyq sheńberinde Assambleıa músheleri 30 qaıyrymdylyq isti qolǵa almaqshy. Sonyń alǵashqysy jýyrda erekshe balalarǵa qamqorlyq kórsetetin qor ǵımaratynyń kúrdeli jóndeýimen júzege asty. Prezıdent bastamasymen 2025 jyl Jumysshy mamandyqtar jyly dep jarııalanǵany belgili. Assambleıa ókilderi osyǵan oraı jaqsy bir istiń uıytqysy bolýǵa umtylyp otyr. Áleýmettik jaǵynan az qamtylǵan 30 jasty qamqorlyqqa alyp, jumysshy mamandyǵyna oqytyp, turaqty jumysqa ornalasýyna járdem bermek.
Assambleıa 30 jyl ishinde qoǵamǵa tirek bolar uıym ekenin dáleldep shyqty. Bárine ýaqyt ózi tóreshi ǵoı. Tıimsiz qurylymdar talap pen suranystan báribir de shet qalyp qoıady. Al shırek ǵasyrdan asa merzim ótse de Assambleıa óz mańyzyn joıǵan joq. Kerisinshe, róli kúsheıip, atqaratyn qyzmet aýqymdylyǵy men maqsat-mindeti ulǵaıyp keledi. Tipti elimizdiń osy ınstıtýttyq modeline tańdaı qaǵyp, úlken qyzyǵýshylyq tanytqan elder kóp. Sondyqtan jasampazdyqqa jol salǵan Assambleıanyń beıbitshilik bastaýyndaǵy uly mıssııasy eshqashan alasarmaıdy.
ShYMKENT