Alǵys aıtý kúni – keń baıtaq Qazaqstanǵa qonys aýdarǵan túrli etnostardyń mıllıondaǵan ókilderi qonaqjaı qazaq halqyna júrekjardy alǵystaryn aıtyp, taǵzym etýdi dástúrge aınaldyrdy. Osyǵan oraı, Qonaev qalalyq kópsalaly aýrýhanasynyń sáýleli zertteý bólimshesiniń laboranty Nıkolaı Nedovodeevpen az-kem tildesken edik. Memlekettik tildi erkin meńgergen jas maman Otany men ortasyna zor alǵysyn bildirdi.
– Nıkolaı Sergeıuly, sóz basyn týǵan jer, ósken ortadan bastasańyz. Medısınaǵa júrek qalaýyńyzben keldińiz be?
– Aýyl – qazaqtyń altyn tamyry, ultymyzdyń uıytqysy ǵoı. Sondyqtan ózim týyp-ósken mekenim Ońtústik Qazaqstan oblysy Shaqpaq-baba aýylyn maqtan etemin. Kıeli mekende 14 jasyma deıin ata-anammen turdym. Dostarym Aıan jáne Rashıd úsheýimiz aýyldyń qara shańyna aýnap-qýnap, aýyr jumysqa ábden ysylyp, mal baǵyp, shóp shaýyp, kókpar tartyp óstik. Aýylymda eshkim qazaq tilinen basqa tilde sóılemeıtin edi, sondyqtan, otbasymyzben Qonaev qalasyna qonys aýdarǵanymyzda orys tilin meńgerip, erkin sóıleý qıynǵa soqty. Sebebi, orys ultynan bolsam da júregim «qazaq» dep soqqan er-azamatpyn. Mektepten soń medısınalyq kolledjge túsip, oqýymdy oıdaǵydaı aıaqtaǵanyma da 5 jyl tolyp qalypty. Mamandyǵymdy adaspaı tańdaǵanyma kúnde qýanamyn. Medısına salasynda eńbek etetinimdi kishkentaı kezimnen-aq biletinmin, óıtkeni, dáriger, medbıkelerdi kórgenimde júregim erekshe sezimde bolatyn.
– Eńbek etetin bólimsheniń jumys jaıyn tarqata ketseńiz.
– Bólimsheniń quramyna rentgenodıagnostıkalyq kabınet, flıýorografııalyq kabınet, rentgendik kompıýterlik tomografııa kabıneti, magnıtti-rezonansty tomografııa kabıneti kiredi. Bólimshede jumys jasaıtyn dárigerler jaqyn jáne alys shet elderdegi iri respýblıkalyq ortalyqtarda oqyǵan. Bólim jetekshi álemdik óndirýshilerdiń dıagnostıkalyq jabdyqtarynyń tolyq jıyntyǵymen jabdyqtalǵan. Jalpy, kez-kelgen emdeý prosesiniń sapasy eń aldymen senimdi jáne tolyq dıagnozǵa baılanysty ǵoı. Sondyqtan men jumys jasaıtyn bólimshedegi dıagnozǵa erekshe jaýapkershilikpen qaraıdy. Sáýlelik dıagnostıkanyń joǵary bilikti dárigerleri men zamanaýı rentgenodıagnostıkalyq apparatýranyń barlyq spektri – durys dıagnoz qoıýdaǵy tabystyń kepili ekendigi sózsiz. Sáýlelik dıagnostıka – bul medısınadaǵy derbes bólim, ol sáýlelenýdiń ártúrli túrlerin qoldaný negizinde dıagnostıkalyq maqsattar úshin keskin alýdyń ártúrli ádisterin biriktiredi.
– Qazirgi eńbek etip júrgen ortańyzdaǵy ózge ult ókilderiniń ózara qarym-qatynasy qandaı?
– Ujymymyz óte úlken. Munda tatar, ózbek, uıǵyr, káris, ýkraın, basqa da ult ókilderimen bir otbasynyń balalaryndaı eńbek etýdemiz. Bir-birimizge baǵyt berip, qamqor bolý, súringenge súıenish, jylaǵanǵa jubanysh bolýdy basty paryzymyz sanaımyz. Mundaı asyl qasıet pen keń peıil darhan dalamyzdan, qazaqy qasıetten boıymyzǵa darydy.
– Qazaqshańyz sýdaı eken. Til meńgerý qıyn emes pe?
– Joq, elimizde sońǵy ýaqytta qazaqsha sóıleıtin ózge ult ókilderi aıtarlyqtaı kóbeıgeni – basty jetistigimiz sanalady. Qazaqsha tek qana ózim ǵana emes, úıdegi ata-anam, baýyrym, jubaıym Nastıa jáne qyzym Emılııa da sóıleıdi. Memlekettik til – ana tilimiz tárizdi, árqashan qurmetteımiz. Qabyldaýyma kelgen pasıentterdiń qalaýyna qaraı eki tilde erkin tildesemin.
– Alǵys aıtý kúninde kimderge alǵys aıtar edińiz?
– Sońǵy jyldary 1 naýryz ortaq taǵdyr toǵystyrǵan respýblıka azamattary men turǵyndarynyń bir-birine shynaıy alǵys sezimderi men rızashylyǵyn bildiretin aıtýly kúnge aınalyp keletini sózsiz. Ult pen ulys arasyndaǵy ózara qurmet pen syılastyq bizdi jańa bıikter men belesterge bastaı beretinine senimim mol. Múmkindikti paıdala otyryp, osynaý keremet merekede, týǵan elime, jerlesterime, ózim eńbek etip júrgen aýrýhananyń dırektory Rakısheva Aıman Ǵalymjanqyzyna, áriptesterime, ata-anama, jaqyndaryma erekshe alǵysymdy bildiremin!
– Jaıdary áńgimeńizge alǵys aıtamyn!
Almaty oblysy,
Qonaev qalasy.