О́tken aptada sportshylarymyz aıtarlyqtaı jetistikterge jetti, solardyń birqataryna toqtala keteıik.
Anastasııa Gorodko Álem kýboginde qola medal aldy
Almatydaǵy Shymbulaq taý shańǵysy kýrortynda frıstaıldyń mogýl, paralleldi mogýl jáne shańǵy akrobatıkasy túrleri boıynsha Álem kýboginiń kezeńdik saıysy aıaqtaldy. Úsh táýlikke sozylatyn jarysta 17 memleketten kelgen 100-den asa sportshy óner kórsetti.
Taıaýda ǵana Álem kýboginiń kezeńin Qytaıdyń Beıdaıhe qalasy qabyldaǵan edi. Aspanasty elinde jerlesterimiz óreli ónerimen óz jankúıerlerin qýanta almady. Bul básekede Anastasııa Gorodko – altynshy, Pavel Kolmakov – jetinshi jáne Iýlııa Galysheva – segizinshi orynda qanaǵat tutty. Basqa sportshylardyń nátıjesi odan da tómen boldy. Sol sebepti de keýde túpkirinde «óz elimizde, óz jerimizde ótetin jarysta janarymyzben jer shuqyp qalmaımyz ba?» degen kúdik basym boldy.
Alǵashqy kúni mogýlshylar saıysqa tústi. О́kinishke qaraı, jerlesterimiz senim údesinen shyǵa almady. Fınalǵa shyqqan Anastasııa Gorodko bul joly da Qytaıdaǵy kórsetkishin qaıtalap, altynshy orynǵa taban tiredi. Odan keıingi jetinshi satyǵa Iýlııa Galysheva jaıǵasty. Bul básekede álem chempıonatynyń qola júldegeri, amerıkalyq Tess Djonson dara shyqty. Onyń otandasy, Beıjiń Olımpıadasynyń kúmis júldegeri, álem chempıonatynyń úsh dúrkin fınalısi Djalın Kaýf kúmispen kúptelse, japonııalyq Rıno Iаnagımoto qolaǵa qol sozdy.
Aýa-raıynyń qolaısyzdyǵyna baılanysty erler básekesi naǵyz qyzǵan shaǵynda toqtatyldy. Sol sebepti de jeńimpazdar men júldegeler irikteý saıystarynyń qorytyndysy negizinde anyqtaldy. Bul rette Maıkl Kıngsberıdiń baǵy jandy. Olımpııa oıyndarynda úsh (1 altyn, 2 kúmis) jáne álem chempıonatynda 13 (8 altyn, 3 kúmis, 2 qola) ret jeńis tuǵyryna kóterilgen Kanadanyń ataqty sportshysy Alataý baýraıynda aldyna jan salmady. Ońtústikkoreıalyq Da Ion Chjan men japonııalyq Ikýma Horıshıma kúmis pen qola medaldi ıelendi. Bizdiń Pavel Kolmakov besinshi orynda qalyp qoıdy.
Kelesi kúni paralleldi mogýldan básekeler ótti. Bul joly 19 jastaǵy Anastasııa Gorodko óz jankúıerlerin qýantyp, qola medali moınynda jarqyratty. Dúnıejúzilik Ýnıversıadanyń eki dúrkin jeńimpazy, álem birinshiligiń qola júldegeri shırek fınalda óziniń komandalyq áriptesi Iýlııa Galyshevany utsa, jartylaı fınalda Djeılın Kaýfqa jol berdi. Al úshinshi oryn úshin tartysta Anastasııa Tess Djonsonǵa son soqtyrdy. Kaýf altynnan alqa taqsa, Rıno Iаnagımoto kúmiske qol sozdy.
Abylaıhan Jubanazar Tashkent Gran-prıniń qola júldegeri
Dzıýdodan Tashkentte ótken Grand Slem týrnırinde Qazaqstannyń 20 balýany kúsh synasqanymen, solardyń arasynan Abylaıhan Jubanazardyń ǵana joly boldy.
Alǵashqy kúni jarys jolyna shyqqan balýandardyń barlyǵy da tusaýkeser kezdesýlerinde súrindi. Atap aıtsaq, Áljan Nurádil (60 kg) men Bozsha Erdáýlet (66 kg) tatamı qojaıyndary Kamollıdın Bahtıerov pen Abdýraqym Nýtfýlloevqa, Erjan Erenǵaıypov (66 kg) BAÁ-niń ókili Qazbek Nagýchevqa ese jiberdi. Ǵalııa Tynbaeva (48 kg) tájikstandyq Ahıla Mýmınovadan, Dıana Býkreeva (48 kg) men Baqyt Qusaqbaeva (57 kg) reseılik Sabına Gıllıazova men Irına Zýevadan jeńildi. Qundyz Jylqybaı (52 kg) ıspanııalyq Marııa Lapýerta Komastyń aldynda jigersizdik tanytty.
Ekinshi kúni Abylaıhan Jubanazar (81 kg) kópshilik kóńilinen shyǵatyndaı óner kórsetti. Alǵashqy aınalymda tájik Sanotýlo Musaevqa san soqtyrǵan ol kelesi kezeńde Bahreınniń namysyn qorǵap júrgen reselik legıoner Gadjımurat Omarovqa ese jiberdi. Odan keıin germanııalyq Tımo Kavelıýs pen japonııalyq Sotaro Fýdjıvarony jyqqan Abylaıhan qola medaldi moınyna ildi. Dál sol mejeden kórinýge Nazgúl Maratovanyń da múmkindigi boldy. Biraq úshinshi oryn úshin básekede onyń álem chempıonatynyń úl dúrkin fınalısi, fransııalyq Iýlııa Tolofýaǵa áli jetpedi.
Al Eset Qýanov (73 kg), Baqytjan Abdýrahmanov (73 kg), Aıdar Arapovty (90 kg), Ermahan Ánýarbek (90 kg), Beıbit Mádıev (100 kg), Marat Baıqamov (100 kg) jáne Elaman Erǵalıev (+100 kg) el senimin aqtaı almady. Sondaı-aq, qyzdarymyz da bastapqy kezdesýlerinde jeńilistiń kermek dámin tatty.
Foto: Qaısar Esenov, Qazaq kúresi federasııasy
Úndistanda Qazaq kúresinen álem chempıonaty ótti
Úndistannyń bas shahary – Nıý-Delıdegi «Tıagaradj» ulttyq stadıonynda qazaq kúresinen álem chempıonaty aıaqtaldy. Eki kúnge sozylǵan saıysta jer jahannyń 20-dan asa memleketinen kelgen 200-ge jýyq balýan baq synady. Olar 16 salmaq dárejesi boıynsha túrli-tústi medaldi sarapqa saldy.
Jarystyń ashylý saltanatynda alǵashqylardyń biri bolyp sóz alǵan Qazaq Kuresi Assosıasııasynyń bas dırektory Damır Bekbosynov: «Úndistanda qazaq kúresin belsendi túrde damyp keledi. Osy kúnge deıin atalǵan memlekette sporttyń osy túri boıynsha tórt ret el chempıonaty uıymdastyryldy. Sizderdiń tól ónerimizge joǵary qyzyǵýshylyq tanytyp júrgenderińiz – bizder úshin úlken maqtanysh. Ekijyldyqtyń basty dodasynda baq synaıtyn balýandarǵa sáttilik, al kórermenderge jarqyn emosııa tileımin, – dep til qatty.
Erler arasyndaǵy básekeler segiz salmaqta ótip, sonyń jeteýinde bizdiń jigitter qarsylas shaq keltirmedi. Atap aıtsaq, Bekjan Tólepov (55 kg), Meıirjan Bereketov (60 kg), Nur Amanshúkirov (66 kg), Jumajan Qojambekov (74 kg), Ersin Seıitqazynov (82 kg), Aıdos Ǵalymov (90 kg) jáne Ersultan Muzafarov (100 kg) bas júldeni qanjyǵalaryna baılady. Tek asa aýyr salmaqta qazaq balýandary top jara almady. Fınalda Nurdáýlet Jarylqapov jeńilistiń kermek dámin tatty. Ol О́zbekstannyń alyby Muqsyn Hýssımýdınovqa ese jiberdi. Al júldeli oryndardy ıelengender qatarynda Úndistan, Grýzııa, Ázerbaıjan, Polsha, Tájikstan jáne Estonııanyń apaıtósteri bar.
Áıelderdiń saıysynda Aıjan Jylqybaeva (48 kg), Raýza Nurmuhambetova (56 kg), Zarına Záripova (65 kg) jáne Álbına Baqıeva (+77 kg) altynnan alqa taqty. Roza Nysantaıqyzy (70 kg) fınalda nıderlandtyq Sem Van Dýnnan utylyp, kúmis medaldi enshiledi. Arýjan Adasqan (52 kg) men Gúlim Elýbaı (60 kg) qola medaldi ıemdendi. О́zge salmaq dárejelerinde Sıtora Elmurodova (52 kg), úndistandyq Anný Anný (60 kg) jáne grýzııalyq Nıno Odzelashvılı (77 kg) ozdy.
Atalǵan sporttyq shara barysynda UWW tehnıkalyq delegaty Onýr Shımshek Qazaq Kuresi Assosıasııasynyń bas dırektory Damır Bekbosynovtyń Birikken kúres áleminiń (UWW) ulttyq kúres túrleri komıteti atqarýshy keńesiniń músheligine qabyldanǵanyn jarııalady.
Taǵy bir aıta keterlik jaıt, tórtkúl dúnıeniń 40-tan astam memleketinde Qazaq kúresi federasııalary jumys isteıdi. Búginge deıin sporttyń osy túrinen 10 álem chempıonaty, 12 Azııa birinshiligi, 6 Álem kýbogi men 6 Eýropa chempıonaty ótti. 2023 jyly qazaq kúresi Er-Rııad qalasynda ótken Dúnıejúzilik jekpe-jek oıyndarynyń baǵdarlamasyna tuńǵysh ret endi. Al 2024 jylǵy V Dúnıejúzilik kóshpendiler oıyndary aıasyndaǵy qazaq kúresi jarysyna 46 memlekettiń 300-den astam sportshy qatysty. Sóıtip, qazaq kúresi – keshendi oıyndardaǵy eń kóp sportshy qatysqan sport túri bolyp tanyldy.
Konkıshi Evgenıı Koshkın Herenvende altyn aldy
Konkıden Nıderlandtyń Herenven qalasynda uıymdastyrylǵan Álem kýboginde Evgenıı Koshkın 500 metrlik qashyqtyqty 34,46 sekýndta júgirip ótip, bas júldeni oljalady.
Ekinshi jáne úshinshi oryndy Beıjiń Olımpıadasynyń kúmis júldegeri, álem chempıony, kanadalyq Loren Dıýbrel (34,51) men jarys qojaıyny, álem chempıonatynyń kúmis júldegeri, Eýropa chempıony Ennıng De Boo (34,52) enshiledi. Esterińizge sala keteıik, osynyń aldynda ǵana Koshkın Herenvende qola alsa, osydan bir apta buryn Polshada aldyna jan salmady.
Vıktor Drýzın Parıjde altyn aldy
Fransııanyń astanasy – Parıjde ártistik júzýden Álem kýboginiń kezeńdik saıysy aıaqtaldy.
Alǵashqy kúni tehnıkalyq baǵdarlama boıynsha synǵa túsken Edýard Kım ulybrıtanııalyq Ranjý Tomblınnen ǵana qalyp qoıyp, kúmispen kúpteldi. Al kúni keshe Vıktor Drýzın jeńis tuǵyrynyń eń bıik satysyna kóterildi. Ol jeke baǵdarlamada teńdessiz dep tanyldy. Saıystyń dál osy túrinde Artýr Maıdanov men Valerııa Stolbýnova juby kúmis medaldi moıyndaryna ildi.
Júlde alǵanymen, joldama buıyrmady
Sý dobynan Qytaıdyń Chjaosıninde ótken Azııa chempıonatynda Qazaqstannyń áıelder quramasy qola medaldi ıelendi.
Sheshýshi synda olar О́zbekstandy 13:6 esebimen eńserdi. Bir ókinshtisi, bizdiń qyzdar júlde alǵanymen, álem chempıonatyna qatysatyndardyń tizimine qosyla almady. О́ıtkeni, atalǵan jarystyń joldamasy tek fınalǵa shyqqan úzdik qos komandaǵa ǵana berildi.