Telefon alaıaqtary ózin bank qyzmetkeri, quqyq qorǵaý organy ókili, jaqyn týys, kompanııa ókili, lotereıa uıymdastyrýshysy retinde tanystyryp, azamattardyń senimine kirýge tyrysady. Olar sizden aqsha aýdarýdy, qupııa derekterdi aıtýdy nemese bank kartasy málimetterin suraýy múmkin. Osyndaı qylmystardyń qurbany bolmaý úshin negizgi saqtyq sharalaryn bilý mańyzdy.
Belgisiz nómirden habarlasqan adamǵa jeke málimetterińizdi aıtpańyz. Bank kartasynyń nómiri, JSN, CVV-kod, SMS-kodtar sekildi aqparattardy eshkimge bermeńiz. Bank qyzmetkerimin dep habarlassa, áńgimeni toqtatyp, bankke resmı nómiri arqyly ózińiz habarlasyńyz. «Sizdiń shotyńyz buǵattaldy» nemese «Sizdiń atyńyzdan nesıe rásimdeldi» degen qońyraýlarǵa senbeńiz. Bank eshqashan telefon arqyly osyndaı aqparat bermeıdi. «Jaqyn týysyńyz qıyn jaǵdaıǵa tústi» degen qońyraýlarǵa senbeńiz. Birden týysyńyzǵa nemese onyń jaqyndaryna tikeleı habarlasyp, aqparattyń ras-ótirigin tekserińiz. «Siz jeńimpaz boldyńyz» degen habarlamalarǵa aldanbańyz. Eger siz eshqandaı lotereıaǵa qatyspasańyz, sizge eshqandaı syılyq túspeıdi. Eger belgisiz nómirden habarlassa, ony ınternetten izdep, alaıaqtar tiziminde bar-joǵyn tekserińiz. Quqyq qorǵaý organdaryna habarlasyńyz. Eger alaıaqtyq áreketke tap bolsańyz, polısııaǵa nemese bankke dereý habar berińiz.