Qarjy Arnaýly memlekettik qordan, qaıtarylǵan aktıvterdiń esebinen berilgen. Bul qarjyǵa Qyzylorda oblysynyń Aral aýdanynda sýmen jabdyqtaý júıesi salynady jáne jańǵyrtylady, dep habarlaıdy Egemen.kz Úkimettiń baspasóz qyzmetine silteme jasap.
Aıta keteıik, 3 myńnan astam halqy bar Toqabaı jáne Abaı aýyldaryn ortalyqtandyrylǵan aýyz sýmen qamtamasyz etý maqsatynda Aral–Sarybulaq toptyq sý qubyryna qosylatyn Aral–Toqabaı–Abaı magıstrali tarmaǵynyń qurylysy júrgizilip jatyr.
«Jobanyń iske asyrylýy 2021 jyly bastalǵan. Ony aıaqtaý úshin qosymsha 3,7 mlrd teńge qajet. Qarjy bólý týraly sheshim qabyldandy. Nysandy 2025 jyldyń sońyna deıin paıdalanýǵa berý josparlanyp otyr», delingen habarlamada.
Sonymen qatar shamamen 400 turǵyny bar Aqbasty aýylynda Aral–Sarybulaq toptyq sý qubyryna qosylatyn Qosman–Aqbasty magıstrali tarmaǵynyń qurylysy aıaqtalýǵa jaqyn. Jobanyń quny – shamamen 2,4 mlrd teńge, onyń 1,8 mlrd teńgesi ıgerilgen. Qalǵan 524 mln teńgesi Arnaýly memlekettik qordan bólingen. Nysandy bıyl iske qosý josparlanyp otyr.
«Osy jobalardy iske asyrý sapaly sýǵa tikeleı qol jetkizýdi qamtamasyz ete otyryp, jańa ekonomıkalyq múmkindikterge jol ashady, aýyl turǵyndarynyń turmys sapasyn edáýir jaqsartýǵa jaǵdaı týǵyzady», dep habarlady vedomstvonyń baspasóz qyzmeti.
Sýmen jabdyqtaý júıesin salý jáne jańǵyrtý Úkimet jumysynyń mańyzdy basym mindetteriniń biri bolyp sanalatynyn atap ótý qajet. Is-sharalar Memleket basshysynyń qalalar men aýyldardy aýyz sýmen 100% qamtý jónindegi tapsyrmasyn oryndaý sheńberinde júrgizilip jatyr.