Ulttyq quryltaıdyń IV otyrysynda Prezıdent elimizdegi kınoındýstrııadaǵy ózekti máselelerge toqtalyp, sapaǵa mán berýdiń mańyzdylyǵyn atap ótti, dep habarlaıdy Egemen.kz.
Memleket basshysynyń aıtýynsha, ótken jyly otandyq mamandar 94 fılm túsirgen. Bul – qazaqstandyq kınonyń damyp kele jatqanynyń belgisi. Degenmen, tek sanǵa emes, sapaǵa kóńil bólý kerektigin eskertti.
«Kórermenniń kóńilin kóterip, kúlki syılaý – bir bólek, jaǵymsyz ádetterdi nasıhattaý – bir basqa. Zorlyq-zombylyqty, qatygezdik pen qylmysty nasıhattaıtyn fılmder de paıda boldy. Osy jerde bir nárseni eskergen jón. Búginde fılmderdiń basym kópshiligi memlekettik tapsyryspen emes, jeke qarjyǵa túsirilýde. Kıno mańyzdy ıdeologııalyq qural ekenin bárimiz jaqsy túsinemiz. Sondyqtan jeke qarjyǵa túsirilse de, fılmdi kınoteatrǵa shyǵarmas buryn aldyn ala súzgiden ótkizý joldaryn qarastyrǵan jón»», dedi Qasym-Jomart Toqaev.
Sonymen qatar, Prezıdent qazaq tilinde túsirilgen «Shoqan. Qashqarııa sapary» degen mýltfılmdi joǵary baǵalap, mundaı týyndylardy kóbeıtý qajettigin aıtty.
«Bul óskeleń urpaqqa áıgili tarıhı tulǵa Shoqan Ýálıhanov týraly málimet beretin óte jaqsy týyndy dep aıtýǵa bolady. Qazaq tilinde ulttyq naqyshta túsirilgen osyndaı mýltfılmder kóp bolýy qajet. Bul – ult bolashaǵyna tikeleı yqpal etetin másele. Sondyqtan anımasııany damytý máselesin qolǵa alý kerek», dedi Memleket basshysy.