Qasym-Jomart Toqaev Ulttyq quryltaıdyń IV otyrysynda bala tárbıesindegi ózekti máselelerge toqtalyp, «Qazaqstan balalary» atty birtutas baǵdarlama qabyldaýdy usyndy, dep jazady Egemen.kz.
«Byltyr mektepterde «Birtutas tárbıe» baǵdarlamasy qolǵa alyndy. Baǵdarlamany qabyldaý – istiń basy ǵana. Endi jańarǵan qujatty elimizdegi barlyq memlekettik bilim oshaǵyna engizý kerek.
Bul qujatty aldaǵy ýaqytta jekemenshik mektepter de basshylyqqa alýǵa tıis. Sebebi tárbıe jumysy balalardy túgel qamtýy qajet. Sonda ǵana bul bastama jalpyulttyq aýqymǵa ıe bolady.
Jobanyń túpki maqsaty – otanshyl, bilimdi, jasampaz urpaq tárbıeleý. Munyń bári – adal azamatqa tán qasıetter.
Quryltaı músheleri aldaǵy ýaqytta osy baǵdarlamany «Adal azamat» dep ataýdy usynyp otyr. Men bul usynyspen tolyq kelisemin», dedi Memleket basshysy.
Prezıdent jergilikti bılik ókilderi men qoǵam belsendileri turmystyq zorlyq-zombylyqtyń aldyn-alý jumysynan shet qalyp otyrǵanyn da eskertti.
«Jergilikti bılik ókilderi men qoǵam belsendileri turmystyq zorlyq-zombylyqtyń aldyn-alý jumysynan shet qalyp otyr. Onyń ústine, osy baǵyttaǵy jumystar qazir ártúrli qujatpen retteledi. Shashyrańqy bolyp tur bári. Sonyń bárin bir jerge jınaqtaǵan durys dep oılaımyn. Osyǵan oraı «Qazaqstan balalary» atty birtutas baǵdarlama qabyldaǵan jón.
Ozyq oıly urpaq ósirý úshin bilim men tárbıe árdaıym qatar júrýi kerek. Ashyǵyn aıtsaq, bala oqytý isinde buǵan deıin bilimge kóbirek nazar aýdaryldy. Al urpaq tárbıesine qatysty júıeli ustanym bolǵan joq. Bul salaǵa tıisti deńgeıde kóńil bólinbeı keldi. «Tárbıesiz berilgen bilim – adamzattyń qas jaýy». Sondyqtan bilimmen qatar tárbıege aıryqsha nazar aýdarý óte mańyzdy», dedi Qasym-Jomart Toqaev.