Býrabaıda ótip jatqan Ulttyq quryltaıdyń IV otyrysynda Qasym-Jomart Toqaev aýyl sharýashylyǵynyń áleýeti men ony tıimdi paıdalanýdyń mańyzyna toqtaldy, dep jazady Egemen.kz.
«Elimizdiń áýelgi múmkindikterine qarasaq, biz áldeqashan álemdegi alpaýyt agrarlyq memlekettiń biri bolýǵa tıis edik. Biraq aýyl sharýashylyǵyna jetkilikti qarjy salynǵan joq. Bul salany jemqorlar men alaıaqtar ıemdenip keldi. Olardyń ishinde memlekettik qyzmetshiler de boldy. Jalǵan málimetterdiń kesirinen memleket qaǵaz júzindegi mal sanyna jyldar boıy sýbsıdııa tóledi. Qazir qordalanǵan máseleniń bárin sheship, agroónerkásip keshenin jańa deńgeıge kóterý úshin kóp jumys jasalyp jatyr», dedi Memleket basshysy.
Sondaı-aq Prezıdent aýyl sharýashylyǵy salasyndaǵy basty maqsatty aıqyndady.
«Biz aldaǵy bes jylda aýyl sharýashylyǵynyń jalpy ónimin eki ese kóbeıtip, osy saladaǵy eńbek ónimdiligin úsh ese arttyrýymyz kerek. Bul – óte mańyzdy mindet», dedi ol.
Buǵan qosa Qazaqstan 10 jyl ishinde bıdaıdy tereń óńdep, daıyn ónim óndiretin jáne ony álemdik naryqqa shyǵaratyn eń úzdik on eldiń qataryna qosylýǵa tıis ekenin jetkizdi.