Búgin Býrabaıda ótken Ulttyq quryltaıda Prezıdent memlekettik áleýmettik tapsyrysqa qatysty zań ázirleýdi tapsyrdy, dep jazady Egemen.kz aqparat agenttigi.
«Quryltaı músheleri Zúlfııa Baısaqova men Baný Nurǵazıeva memlekettik áleýmettik tapsyrystyń krıterıılerin qaıta qaraý jáne úkimettik emes uıymdar týraly zańnamany jetildirý qajettigin aıtty.
Azamattyq sektor reformalardy júrgizý jáne qoǵamdy damytý isinde mańyzdy ról atqarady. Memleket pen úkimettik emes uıymdardyń seriktestigi ózekti máselelerdi sheshýge, jasampaz qundylyqtardy dáripteýge jáne ulttyń jańa sapasyn qalyptastyrýǵa yqpal etedi», - dedi Qasym-Jomart Toqaev.
Sondyqtan memlekettik áleýmettik tapsyrystyń tıimdiligin arttyrý úshin qazirgi zamannyń talaptaryna saı keletin jeke zań kerek.
«Árıne, zań jobasyn ázirleý barysynda qujatqa tereń jáne jan-jaqty saraptama jasalýǵa tıis. Quzyrly organdar sarapshylar men qoǵamdyq uıymdardy tarta otyryp, bul máselemen aınalysýy kerek», - dep tolyqtyrdy sózin Memleket basshysy.